Anyos antes un diya me bushko la defonda Klara Perahya i me disho ke no ay dingunos ke esta eskrivyendo un artikolo sovre la politika en Judeo-Espanyol en el Şalom. I esto deve de ser un dover para ti. Me vas a prometar ke vas a eskrivir en Judeo-Espanyol para el Şalom. Le respondi ke va aprovar. Si puedo, lo va azer. I empesi a eskrivir. Los primeros artikolos eran reelmente sovre la politika. Ma dospues la mas grande partida fue sovre la aktualitad de muestra komunidad, sovre la kultura, sovre la muzika, sovre las aktividades artistikas, sovre las ekspozisiones i sovre muestro muzeo i sus aktivitades. Reelmente no me esto mizmo akodrando kuantos anyos antes empesi a eskrivir en Judeo-Espanyol, ma oy en diya esto muy kontente de pueder eskrivir en esta lingua. No se egzaktamente si ay muncha djente ke meldan mis artikolos ma de vez en kuando syertas personas vienen a mi lado para felisitarme sovre mis artikolos o para kritikar syertas ideas. I esto me aze plazer. Eskrivi esto todo porke esta semana kero eskrivir sovre las relasyones eksteryores de muestro payis empesando por Israel. Ya mos akodramos del malo diya del 29 Enero 2009 en Davos ande el Presidente Shimon Perez estava endjuntos kon el Primer Ministro Turko, Erdoğan en una konversasion ande “salio la fedor”. Mizmo dyes anyos dospues no alkansaron a eliminar este problem.
Un anyo i medio dospues, el 31 de Mayo del anyo 2010, solo dos mezes dospues ke eskapi mi mision de presidente en muestra komunidad, esta vez fuimos shaet del kavzo de “Mavi Marmara”. Un vapor o motor ke se metyo en kamino de Antalya para ir a Israel i protestar Israel i protejar los derechos de los Palestinianos. Ma los soldados Israelyanos atakaron este vapor i las relasyones Turko-Israelyana se achunko. I vemos ke las relasyones entre Erdogan i Netanyahu no kamino. No se dyeron la grasia. Vemos ke onze anyos dospues kon el muevo presidente de la Republika Israelyana, el Sinyor Isaac Herzog bivimos munchos trokamyentos. No se si puedemos dizir: “Se dyeron la grasia”. Es djusto ke avia un alay de kozas ke enteresava los dos payizes. Dospues de la gerra entre la Rusia i la Ukrayna, el gaz natural fue un problem por el mundo entero i lo mas emportante por los payizes Evropeos. Ya savemos ke Israel tyene una grande reserva de gaz natural ke puede vender. I el kamino el mas ekonomiko es pasando por la Turkiya. Antes de las eleksyones ke se van realizar lo mas tadre en Junio 2022, el presidente Turko kere buenas relasyones kon los payizes ke dezazio las buenas relasyones. Ejipto, Israel, Siria son los prensipales de estos payizes.
De punto de vista ekonomika los dos payises tyenen muy emportantes relasyones ekonomikas. La Turkiya esta eksportando a Israel serka de 612 milyones de dolares i Israel esta eksportando 475 milyones de dolares. Una ekonomia mas grande de una milyarda de dolares para dos payizes ke no tyenen relasiones diplomatikas al grado nesesaryo.
Estos diyas dalkavo, muestro amigo Rafael Sadi eskrivyo un artikolo sovre una persona ke va ser nominado ambasador a Tel Aviv. Ma sovre lo ke eskrivyo es un sinyor ke tyene ideas muy serka kon los Palestinianos. No esto siguro si un ambasador asemejante va ser achetado por el estado Israelyano. Ma kreo ke la diplomasia va dar la mijor dechizyon.
