La semana pasada di syertas eksplikasyones sovre las relasyones entre la Turkiya i Israel. Ya savemos ke la Turkiya esta azyendo todo lo ke es posivle para ameliorar sus relasyones kon los payizes Arabos, kon Israel i kon otros payizes. Es los anyos dalkavo izimos todo lo ke era posivle para bozdear las relasyones diplomatikas kon munchos payizes. I kon esto todo, tenemos bastantes problemes internasionales. I agora estamos tornando atras. No mos plazyo lo ke estava azyendo Abdulfettah es Sisi; el prezidente de la Republika Ejipsiana i desidimos de kortar todas las relasiones kon el Ejipto. Portanto las relasyones kon el Ejipto eran muy emportantes para mozotros. No deviamos de enteresarmos kon los Ermanos Musulmanos i su lider Muhammet Mursi. La mizma koza kon la Union de los Emiretes Arabos. En primero no kijimos relasiones kon eyos; ma dospues izimos esforsos para ameliorar estas relasiones. Ay munchos otros payizes ande keremos trokar las relasiones.
Kreo ke ıuno de los mas emportantes es la Siria. En primero, teniamos muy buenas! relasiones. Dospues todo troko i bivimos problemes muy emportantes. Para protejar los musulmanos ke no son Shihit los akseptimos a la Turkiya. I dingunos no saven la populasion Siriana ke esta biviendo en muestro payis. Se avla de una populasion entre tres milyones i medio i sinko o sesh miliones. Los Evropeos no kijyeron ke estos Sirianos imigren a sus payises. Akseptaron una chika populasion de alta kalitad de punto de vista estudios i profesion. I dyeron un poko de paras a la Turkiya para ke no vengan a los payizes Evropeos. Ma la Turkiya gasto sesh o syete vez mas muncho de lo ke tomo de los Evropeos. I no savemos si reelmente la Turkiya resivio esta moneda! Desparte de los halis Sirianos ay un alay de teroristos ke estan bivyendo en Siria serka de la frontyera Turka i tenemos el espanto ke un diya esta banda de bandidos sean akseptados a muestro payis. Una partida son sitizanos Evropeos ma los payises Evropeos no los keren achetar. Ya savemos ke una grande partida de los Sirianos lavoran en Turkiya i munchos lavoran illegalmente. Yo en muestra fabrika tengo solo dos sirianos ke lavoran legalmente. Demandamos kada anyo del ministeryo del lavoro el derecho para ke pueden lavorar. I tenemos el derecho de dar lavoro a un estranjero para kada 7 turkos. Ke no vos pareska ke es mas fasil de lavorar kon esta djente… Kualo pensa el governo? Se avla ke dyeron la nasyonalidad turka a munchos de los sirianos. I el governo de oy kere resivir sus votos en las eleksyones de 2023. Reelmente es un problem muy emportante. El governo esta vyendo ke la djente no kere estos Sirianos, i agora trokaron de idea para pueder embiyar atras una partida de eyos. Bivir i ver…
El fondador de la Turkiya, Atatürk era un ombre muy entelijente. Malgrado ke era un militaryo, dospues ke se eskapo la Gerra de la Liberasion no vistio mas su vistido de Asker. I su idea era “Pas en muestro payis; pas en el mundo”. I nunka no kijo ni la tyerra de un otro payis, ni la gerra para ke el payis biva problemes…
