Mushi Halioua es el solo judio ke kedo en Marakesh. Halioua esta biviendo en el barrio judio de la sivdad oksidental marokana de Marrakech, ande esta lavorando en su magazen de tekstil.
Su chiko echo, en una plasa al bodre de la juderia, aparteniya a su famiya. En el anyo 1962, merkaron este magazen kuando vinieron a Marrakech de Zagora, ke es situado 350 kilometros al sureste.
La majorita de los judios abandonaron Marroko despues de la fondasion del Estado de Israel en 1948. Ma, la famiya de Halioua kedaron en el pais arabo, ande agora kedo solo 3.000 judios. En el venten siglo, biviyan 400.000 judios.
En Marrakesh, aviya 35 sinagogas i una komunidad judia de miles de personas.
Poko tiempo antes, en la sivdad marrokana aviya dos templos i biviyan 200 judíos –entre eyos los 70 eran etranjeros de paizes komo Fransia, Ingletiera i Estados Unidos.
La komunidad empeso a profitar de la renovasion del akordo entre Israel i Marroko en 2020. Kada semana 200-300 israelianos empesaron a vijitar Marroko grasias a los aviones direktos entre los dos paizes.
El magazen de Halioua se izo popular entre los turistos, ke avlan unas kuantas palavras kon Halioua en ebreo.
El shef del Mayor del Estado Israeliano vijito Halioua en su vijita ofisial a Marroko a la fin de julio. “Yo so el solo judio aki, no kedo mas dingunos. Aviya munchos judios en Zagora, ma todos se fueron en los 1960’s. Todos estos magazenes ke estas viendo por aki apartenian a los judios. En el barrio antes no aviya arabos”, disho Halioua asentado en una meza yena de ropas de mil kolores ke se estan vendiendo por metro en un pais ande muncha djente dan a kuzir sus ropas a los shastres.
"Todos los magazenes de los judios se serravan los viernes i se avriyan Alhad demanyana. Aviya una pared i los muzulmanos no puedian entrar”.
Halioua disho ke no kere irse a bivir a Israel, ande aprovo a bivir en los anyos 70. “No kamino bueno, aki esto lavorando muy bueno”, disho Halioua. Su relasion kon sus vizinos esta muy bueno. “No esto lavorando kon los judios, esto lavorando kon los arabos”.
Halioua, ke esta biviendo kon su mujer en el etaj dalkavo de su magazen, se esta akodrando komo en Marrakesh “aviya munchas sinagogas i ke kedo solo dos deyas’’. Una de estas es Alazmah, situada unos kuantos blokes de Halioua. Fue konstruida por los judios ekspulsados de Espanya en 1492. Le dieron el nombre “la sinagoga de los deportados”.
Jackie Kadouch, prezidente de la komunidad judia de Marrakech, disho ke se realiza orasiones kada diya en las dos Sinagogas, grasias a los turistos israelianos. “Ay muncho turizmo aki i kada grupo ke pasa por aki vienen a verme, i a saludarme”, disho Halioua.
