Es ke los shefes de los studios abokaron kavesa a las demandas de los nazis?
El eskrivano de un livro polemiko kavzo konfuzion en Hollywood. El eskrivano esta revelando la kolaborasion entre grandes studios i la Alemanya Nazi antes de la Segunda Gerra Mondial. “Kero kitar en medio una koza sekreta en la istoria de Hollywood’’ disho el investigador de Harvard, Ben Urwand.
Urwand estudio diez anyos los archivos de los alemanes i de los Estados Unidos. "Los shefes de los studios de Hollywood, ke eran judios refujiados de Evropa del Este, lavoraron kon entuziazmo kon los sansores de Hitler para trokar los filmos o anular produksiones ke estavan atakando los nazis, porke keriyan protejar el merkado sinematografiko aleman" esta diziendo Urwand.
“En la dekada de 1930, los studios de Hollywood no solo izyeron kooperasion kon los alemanes en no aziendo filmos ke estan atakando los nazis, ma en mezmo tiempo no defendieron los judios, i no amostraron la persekusion de los judios ke los nazis estavan azyendo”, disho Urwand.
El livro ‘’The Collaboration: Hollywood's Pact with Hitler’’ esta afirmando ke la relasion estava tan serka ke MGM, ke es el studio el mas grande en este momento, ayudo a Alemanya a anular las restriksiones de eksportasion.
"Kolaborasion, no es una palavra ke envanti yo. Topi estos materiales en munchos lugares. Es una kolaborasion de los direktores del sinema de Hollywood i los fonksionarios nazis. Los nazis estavan diziendo la palavra dalkavo", disho Urwand. "Los direktores no keriyan pedrer sus lavoros. No kerian irsen a kaza i tornar kon postos diferentes. Tambien se estavan imajinando ke Hitler iva ganar la gerra i keriyan lavorar kon los nazis para protejar sus postos de lavoro".
Urwand disho sovre su investigasion: "No todos los judios de la industria del sinema ma siertos judios estavan lavorando kon los lideres nazis".
Urwand, deskuvrio evidensia ke 20th-Century Fox en una letra en Enero de 1938 demando las opiniones de Hitler sovre un filmo. La letra estava firmada "Heil Hitler".
Tres studios: MGM, Paramount i 20th-Century Fox, no abandonaron la Alemanya asta los 1940’s. Aviya regulasiones ke los nazis aviyan metido. Si en un filmo aviya partes ke puediya danyar el prestijio aleman, este filmo no se puediya amostrar en kualsiker payiz del mundo, no solo en Alemanya.
Hollywood saviya muy bueno lo ke se estava pasando en Alemanya, la persekusion de los judios ya se saviya en este momento". Georg Gyssling, el konsul de Hitler en Hollywood, estava aziendo vijitas al studio, para anular produksiones ke eran kontra los interesos de los nazis.
En 1936, el prezidente de MGM, Louis B. Mayer, anulo las shenas de un filmo ke estavan amostrando ke la demokrasia era mijor del fashizmo. Esto puediya kavzar problemes kon el governo aleman.
