En lo ke moravamos en Galata, todos los vizinos en el apartamento, tanbien la kaleja entera i el esnaf eran judios. Debasho de mozotros moravan dos ermanas aedadas, endjuntos kon la ija de la una, mueva kazada. Las yamavamos “Las Kukuvayas”. Deke las yamavamos ansina? Porke no teniyan esfuenyo i noche entera se asentavan en el shahnishi de sus kamaretas i espionavan la kaleja. Ken entro, ken salyo, ets.? De todo teniyan haber. I siguro al diya kaminavan de vizina en vizina para kontar lo ke viyan de noche.
Un diya mos viene la kukuvaya grande kon unas soflamas. Mi madre la asento, le dyo una kupa de agua, le kozyo un kafiko para kalmarla. I le demando: Ka pasa Madam Rashel?...
-Ah no demandes, no demandes Idika hanum, mi yerno la esta enganyando a mi ija. Legrinyado, esto le iva azer a mi ija?
Estava kon unos inyervos ke no estava metyendo ni una virgul a sus frazes.
Mi mama la kalmo un poko i le disho: Madam Rashel, tu yerno David es un ijiko muy kebar, enstruido, de buena famiya; no kreyo ke va azer una koza semejante. De ande te ambezates ke la esta enganyando? Kon ken la esta enganyando? Tienes provas para dizir esto?
-Siiiiiii siguro. La esta enganyando a mi ija kon la vizina de enfrente del apartamento.
Enfrente del apartamente muestro en el sigundo etaj morava una famiya kon una ijika de 18 anyos, ke ya aviya eskapado el lise i lavorava en una banka.
-Madam Rashel, es posivle? Esta ijika es dainda muy chika para tener amor kon tu yerno.
-No! Yo ya se. Ya tengo prova.
-Peki kontame la prova ke tienes?
-Anoche aviya muncha luvya ya saves. A las 6 ya estava bien areskuro. En supito espunto de la punta la kaleja mi yerno i en la mano teniya un chadir roto. Ke se le abolto del ayre. Despues de 10 puntos kualo vide? I la vizina denfrente viene, en la mano el chadir roto aboltado al aroves. Vites hanum, vites? Es ke estavan endjuntos. Entro a la kaleja, el, en primero i un poko despues entro eya. Para no entrar endjuntos. Le va dizir a mi ija, ke pishin se kiten. No puedo akseptar yo una traizyon semejante.
-Madam Rashel. Esto no es prova. Anoche aviya muncha furtuna. Kreyo ke muncha djente torno a kaza kon el chadir roto. Ke te paresyo madam Rashel? Duello izieron kon los chadires? Es muy natural si se les bolo o rompyo los chadires. Ya saves la punta de Bankalar Caddesi es renomada por sus ayres fuertes.
I avlo, i avlo mi mama, asta ke la konvensyo a madam Rashel ke el yerno, David no es un ijiko ke puede azer una koza semejante, porke la keriya muncho bien a su mujer. Ansina se kalmo madam Rachel i kon las palavras de mi mama se salvo el kazamiento de su ija. Despues de un anyo se kazo la ijika i se fue de muestra kaleja. Madam Rashel tuvo inyetos i se olvido todo.
