Dos Papazes desidyeron de ir a Goa en India por el konje ke teniyan i para no ser konosidos komo papaz, desidyeron de ir a la plaj merkandosen mayos de los mas modernos, antojos pretos, chapeyo de sol i se asentaron en el shezlong mirando alrededor, kuando una chika kon un bikini de lo mas chiko pasa delantre de eyos saludandolos, “Buen diya Padre Pavlo, buen diya Padre Pedro”!
El otro diya los dos papazes ke no keriyan ser konosidos, desidyeron de trokar los mayos, los antojos, el chapeyo i echados en el shezlong vieron la mizma chika kon un bkini aun mas chiko, pasando delantre de eyos i dizyendoles, “Buen diya Padre Pavlo, buen diya Padre Pedro”. Uno de los papazes demanda a la chika, “Komo saves ke semos Papazes?” La chika responde: “Komo? no me konositesh? Yo so la Ermana Maria!”.
Un diya una mujer se va al dantist i le demanda: "Kuanto kosta travar la muela de hohma”? El dantist le responde “500 liras”. “Esto es muy karo, no ay una forma ke seya mas barato?” “Si, dize el dantist, si no keres anastezia te sale por 300 liras”. “Yene muy karo, mas barato?” “Si keres sin anastezia i kon kerpeten, te sale a 200 liras”. “Yene muncho”. “Mi elevo ke esta en la primera klasa de la universita te lo aze por 100 liras”. “Esto esta bien, dize la mujer. Apunta para amanyana un randevu kon tu elevo para mi Esfuegra”!
