Todo el ke vijita Tiberia en Israel, no mankan siguro de pasar unas kuantas oras o diyas en el Otel Grasia Nasi. Es un muevo otel yeno de rekuerdos del pasado, del siglo 16. Epoka de la ronesans atada a la sinyora Hanna Nasi Benveniste, konosida kon el nombre de Donna Grasia. La struktura arshitektural de este otel, mos akodra los palasios del Portugal, de Venezia i de Estambol de esta mizma epoka. Es el uniko Otel ke poseda tanbien un muzeo ke se topa en su lobi. Diya entero se oye las notas de piyano de una muzika dulse del tiempo de Donna Grasia. Los vijitadores del otel, chikos komo grandes son envitados a eskojer entre las 100 vistimientas de la epoka i de fotografiarsen ansi vestidos. El muzeo poseda una kamareta yena de 100 fostanes i vistidos de los anyos de Dona Grasia. Kada uno puede eskojer lo ke kere.
Donna Grasia es una figura de mujer, un bastion briyante de muestra istorya. Nasida en 1510 de una famiya de maranos, fuyidos de la Espanya i de la Engizisyon i enstalados en el Portugal, kon el nombre de Beatriche de Luna, ke se troko en Grasia Nasi, kuando eya torno a la ley de sus padres. Un nombre ke yevo kon grande orgolyo su vida entera.
Su vida fue dedikada a salvar sus ermanos judios, a mirar de aparejarles una vida mueva i siguro en la tierra santa.
Todos konosemos muy bien su destino, komo merko en Eretz Israel tierras de Kanuni Sultan Suleyman, komo izo transaksyones kon los grandes de su tiempo i komo aregalo de su fortuna i enerjiya para salvar del fuego munchos de sus ermanos judios…
Larga istorya donde la dalkavo etapa fue en Estambol ande muryo en el anyo 1569. Se eskriviya munchas alavasyones sovre eya. Si no me yerro kada anyo fiestamos el purim de la Sinyora. Seriya enteresante de vijitar el otel Donna Grasia en Tiberia, ke es un rekuerdo de la figura lejendera de la ke yamamos aki kon amistad i emosyon “La Sinyora”.
