Dospues ke empeso la gerra entre la Rusia i la Ukrayna, los payizes Evropeos tomaron lugar kon los Ukranyanos i no kon los Rusos. Ya savemos ke la Evropa no kere / o no keria mas emplear las santrales nuklear, ni el karvon para azer lavorar syertas santrales. I preferaron de emplear el gaz natural Ruso. El gaz natural ke emplean los payizes Evropeos, es empleado lo mas muncho de la Rusia. I savemos ke la mas grande partida es empleada por los Alemanes. Kreo ke a lo manko dos anyos los Evropeos van a tener problemes muy emportantes para la elektrisitad ke tyenen de menester para aklarar i para la endustria. I tyenen de menester de una enerjia para pueder kayntarsen en invyerno. Todos estos payizes empesaron a emplear sus santrales nuklear. I los presyos de la elektrisitad i del gaz natural va ser una lokura. Estamos oyendo haberes ande se esta avlando de un presyo loko. Ocho o dyes vezes mas ke el anyo pasado. Komo van a reushir a pagar estas paras. En muestro payis los establesimyentos turistikos estan azyendo planes para pueder resivir en invyerno unos kuantos miliones de Almanes retretados. Van a bivir en el sud de la Turkiya en Alanya o Antalya ande no se emplea kaloriferes. El tyempo es bastante dulse mizmo en invyerno. I esto va ser un mirakolo para el turizmo Turko.
Merkar la enerjia o el gaz natural de un payis es reelmente muy danjeroso. I si es un payis komo la Rusia ke tyene un presidente bastante otoritaryo, mas. Es puedeser la misma koza para la Turkiya. Ma oy en diya es el payis ke tyene buenas relasyones kon estos payizes. Merkamos el gaz natural de la Rusia; del Azarbeycan, de la Persia i otros payizes. Ma si la Rusia mos dize ke no mos va dar mas este gaz guay de mozotros! Oy en diya, mizmo el gaz Israelyano esta bastande presiozo i kon la Turkiya keren vender este gaz a los payizes Evropeos.
En las kapitales evropeas estan limitando mizmo las oras de aklarar las kayes i las vitrinas de los magazenes. Ya savemos ke serka del fin del anyo todas las vitrinas son aklaradas i la djente aze paseos para pueder ver este festival. Malorozamente este anyo no va ser la mizma koza.
Mi ija kon su famiya biven en Londra i tyenen un restoran. Van a empesar a pagar una fortuna para la elektrisitad i para el gaz natural. Mi ija me disho ke no pueden pujar el presyo de la elektrisitad porke tyenen un kontrato kon una kompanyia. Ma kualo van azer dospues de tres o kuatro mezes kuande el kontrato se va terminar? En muestro payis es la mizma koza para la elektrisidad. Puedesh merkar la elektrisitad de otras kompanyias. I si tenesh kontrato fina la fin del anyo estash orozos unos kuantos mezes. Ma dospues vash a pagar a lo manko dos vezes mas. Vemos ke todo modo de gerra es un problem muy emportante para la umanidad.
Kualo avia dicho Atatürk, el fondador de la Turkia: "Pas en el payis, pas en el mundo”. Atatürk era un lider muy presyozo porke era un soldado ma saviya la valor de la PAS.
