El 5 de Septembre marko el 50’en aniversario del masakro de Munich, del asesinato de 11 entrenadores i atletes israelianos ke fueron tomados komo rehenes akeya noche. La polisia de la Alemanya Oksidental no fue kapache de salvar los rehenes.
El governo aleman realizo un servisio komemorativo en Munich, dias despues de ayegar a un akuerdo de kompensasion de 28 miliones de euros kon las famiyas de las viktimas i izieron una deklarasion rekonosiendo los yerros ke el "estado aleman" izo akel dia.
Durante anyos, las famiyas de las viktimas, endjuntos kon el governo israeliano, afirmaron ke la Alemanya no protejo los atletes israelianos.
A las 4 a.m. del 5 de Septembre, ocho miembros del grupo teroristo palestiniano saltaron a la villa olimpika ande estavan durmiendo los djugadores i entrenadores del ekipo israeliano. Mataron dos djugadores, Moshe Weinberg i Yousef Romano porke kijeron rezistir a los teroristos. Los teroristos tomaron rehenes los mueve djugadores israelianos. Las prekosiones insufizantes de seguridad de Alemanya permetieron a los teroristos de entrar fasilmente a los apartamentos de la villa olimpika. Tambien la komunikasion insufizante i los polises sin eksperiensia kavzaron el kaos en la pista de aviones ke marko el final de la kriza.
Una deklarasion en el anyo 2012 afirmo ke la Alemanya fue enformada de un posivle ensidente teroristo, semanas antes de los Djugos. La deklarasion de Alemanya amostro ke estos yerros izieron pujar el shifro de kompensasion de 10 miliones a 28 miliones Euros despues de entrevistas kon las famiyas.
El dia sigiente, uvo una konfuzion entre los atletes no israelianos en el kampo. Los djugadores no supieron los detalyos. Un miembro del grupo de teroristos ke tomaron a los israelianos komo rehenes fue visto kon una maska en el balkon del apartamento. Durante oras, los detalyos no se supo.
Los teroristos demandaron la liberasion de mas de 200 politikos palestinianos ke estavan emprizonados en Israel. Ma la primera ministra israeliana, Golda Meir, disho ke no va negosiar kon los teroristos. Esto desho en las manos del governo aleman, a reglar las kozas.
Los teroristos demandaron de ser transferados a Kairo. Las otoridades alemanas peryeron munchas oportunidades para matarlos o arestarlos en el kamino. Los otobuses yevaron los atakantes i los rehenes kon los ojos atados a varios helikopteres i despues los yevaron a una baza aerea serka de Nato. Los tiradores sin eksperiensia se enstalaron en el lugar de akontisimiento ma no aviyan resivido las korektas armas para tirar de larga distansia. Los vehikulos atados kon asistensia de apoyo kedaron atrapados en el trafiko en la baza; i los palestinyanos deskuvrieron fasilmente ke el avion ke pensavan ke los iva yevar a Kairo aviya aparejado una trampa. Despues de un kombate kon la polisia alemana, uno de los teroristos echo una bomba a uno de los helikopteres, matando a los israelienos ke estavan aryento; un otro teroristo tiro a los israelianos ke estavan en el otro helikopter.
El prezidente del Komite Olimpiko Enternasional, Avery Brundage, desido de kontinuar kon el resto de los djugadores despues de realizar un servisio komemorativo en onor de las víktimas. El resto de la delegasion olimpika israeliana abandono Munich.
