La majorita de los imigrantes ke viniyan a Israel, durante la sigunda perioda de la aliya en 1904-1914, se enstalaron en las sivdades. Una de estas sivdades ande los judios preferavan bivir, era Yafa. En 1888, 1500 judios biviyan en Yafa, i en 1905 ya eran 5000. La majorita de los judios lavoravan en el komersio, i en la artesaniya. Yafa atirava la djente porke era una sivdad grande al bodre de la mar kon un puerto emportante en medyo del payis. Los vapores akostavan al puerto i kon los kaminos, ayegavan los bienes a las otras sivdades komo Yerushalayim, Tiberia, Haifa, Safed i munchas mas. Ma los mansevos de estos judios ke moravan en Yafa, mas no keriyan bivir en una sivdad kon kalejikas estrechas i suzyas. Keriyan fraguar un kartiye ebreo, muevo, limpyo, kalmo i ordenado. Ansina, en 1907, se organizo un grupo de 60 famiyas. Merkaron terenos yenos de safra al bodre de la mar, en el norte de Yafa. En 1909, ampesaron a fraguar un kartiye muevo i lo yamaron Ahuzat Bayit. Despues, para espartirsen las kazas, izieron una loteriya. Tomaron 60 midyas pretas i 60 midyas blankas. En las unas eskrivieron los nombres de las famiyas i en las otras eskrivieron los numeros de las kazas. Ansina sin ke ayga diskusyones, kada uno se aparteno de su kaza. Djusto en medyo del kartiye izieron un pozo i una kula ensima, para responder a la nesesita de agua de los moradores. Un poko de tiempo despues, el “djimnazio Herzeliya” (el primer djimnasio ebreo) lo transferaron de Yafa a la kaleja Herzl. Agora en el mizmo lugar se topa “Migdal Shalom”.
Munchos nombres fueron propozados para nombrar este kartiye muevo. Komo: Herzeliya, Ivriya, Aviva, Yafafiya. Ma a la fin akseptaron el nombre de Tel Aviv, ke era la traduksyon del nombre del livro de Theodor Herzel “Altneuland”. El primer Prezidente de la Munisipalitad fue Meir Dizengoff. Komo Tel Aviv era una sivdad mueva para morar, no era permetido de avrir botikas, oteles, restorantes. Ma en 1911, disheron ke ya se puede avrir unos bufes para ke se vendan bevyendas yeladas o dondurmas, a una kondisyon de no meter siyas i mezas delantre para asentar. En 1913 se avriyo el primer sinema. En 1914 ya aviya kaje 139 kazas. En el tiempo de la primera gerra mundiala, el developamento de la sivdad se areto. Los turkos entraron en 1917 a Yafo i a Tel Aviv i arondjaron a todos los judios de aya, afuera las sivdades. Porke la armada britanika estava avansando del Sud. Despues la viktorya de los britanikos, ampesaron los judios avagar avagar a tornar atras a sus kazas. Despues ke eskapo la gerra, ampesaron a vinir los Olim a Tel Aviv. I mas munchos judios ampesaron a salir de Yafa porke los arabos mataron munchos judios. Sovre esto se alevantaron las leyes ekonomikas en Tel Aviv. Las otoridades del mandato britaniko dieron a la sivdad otonomiya. Ansina ampeso la sivdad a developarse muy presto.
Agora Tel Aviv Yafo es la sigunda grande sivdad de Israel. I la yaman “la sivdad ke nunka se keda”.
