El byervo de vakansas esta vinyendo agradavle al uyido.
Kualo es las vakansas? Es bivir komo keres. Sin tener dinguna ovligasyon, pueder azer todo lo ke se dezea.
Las vakansas son una invensyon de la epoka moderna komo konsepto. Si komparamos la fason de lavorar de antes trenta anyos por egzempyo, todo era muy organizado.
Las oras de lavorar, los dias del lavoro, las vakansas, los ofisyos i munchas otras kozas.
Las oras del lavoro de un ofisyo era de las mueve de demanyana fina las sesh o syete. Shabat, alhad no aviya lavorar. Todo era mas ordenado. Se lavorava en el echo i la kaza era el lugar de repozar.
Kuando los ijos eran chikos, mos ivamos a las vakansas kon eyos, mos kansavamos, ma estar todos endjuntos era un grande plazer i eramos felizes. Djugar kon eyos i nadar en la mar, azer spor, teniya otra savor. La modernizasyon esta transformando profondamente muestras vidas. En este dor ke los mansevos no tyenen ni oras, ni dias de lavoro, porke estan lavorando 18-20 oras al dia, las vakansas son indispensables. Mizmo 4-5 dias kalman la persona i lo detyenen leshos de los problemes. Les da mas muncha pasensya para suportar los chikos. Kale tomar enerjiya para pueder lavorar kon muncha ardor i ganar para pueder abasteser a las nesesidades de la famiya.
En el dor ke estamos bivyendo la vida esta muy difisil para todos ma, lo mas muncho para los mansevos i los ke tyenen ijos chikos. Los gastes de kaza, de las eskolas, los instrumentos teknolojikos ke estan demandando las profesoras, las komputadoras, de las ayudaderas en las kazas, seya para los chikos, seya para azer el echo de kaza ets… estan a no pueder alkansar.
Los marketes, los bazares mizmo estan muy karos. Las legumes, las frutas, el nesesaryo de las kazas no se estan eskapando.
Veramente mizmo ke estan lavorando marido i mujer estan alkansando kon muncha difikulta a todos los gastes.
Por esta kavza, munchos mansevos ke estan topando echo en la Evropa, en Israel o en la Amerika se estan yindo para asegurar sus futuros i el futuro de sus kriyaturas.
Es un grande sakrifisyo ke estan azyendo para sus ijos. No es fasil, deshar la dolche vita aki, entornados de kerensya de sus famiyas i amigos, i yir a un pais etranjero sin dingunos.
Las vakansas refreskan a la persona i dan una motivasyon mueva para empesar kon ahadu i fuersa mueva para las difikuldades de la vida. Para pueder trokar las ideas i repozarmos, mizmo kon poka posibilidad kale azer vakansas para deskansar el puerpo i el meoyo.
Keridos Lektores, vos auguro un buen enverano fina Rosh-Ashana ke sera el anyo muevo yena de sanedad, repozo i felisidad.
