Puedemos dizir ke la istorya de los Djudios en Kıbrıs es sin grande eventos malgrado la proksimidad de la isla a la Evropa i a la Tyerra Santa.
Kıbrıs, la tresera izla la mas grande del Mediterraneo, fue el lugar de una importante komunidad Djudia durante la era romana, i se fraguaron munchas sinagogas en la izla. De otra parte, en 117 A.C., los Djudios de Kıbrıs partisiparon en una rebelyon kontra los romanos i, en repuesta, los romanos ekspulsaron a los Djudios de la izla. La prohibisyon no turo muncho, i la komunidad torno i prospero kon pokos evenimyentos de antisemitizmo importante.
Durante la Edad Medya ay rejistros de komunidades Djudias en Famagusta, Nicosia i Paphos. Ma despues ke Kıbrıs fue konkerido por el Imperio Otomano en el siglo XVI, la komunidad se enchikesyo i la prezensya Djudia no fue anrejistrada asta ke la izla entro debasho la administrasyon britanika en 1878.
En 1883, un grupo grande de Djudios rusos fundaron un kazaliko en Orides, serka de Paphos. Dos anyos mas tadre, 27 rumanos yegaron a Kıbrıs, ma sus kazales no prospero. Se aprovo otra koloniya, esta vez kon el apoyo de la Asosiyasyon Kolonial Djudia i Ahavat Zion de Londra en 1897, en las areas de Margo, Kuklia i Cholmachi. Vinyeron mas de dos dozenas de Djudios romanos i sus famiyas, ma, komo munchos otros egzempiyos, estos kolones no estavan aparejados para las difikultades de lavorar kon la tyerra.
La relasyon la mas sinyifikativa de Kıbrıs kon la istorya Djudia es el rolo ke djugo la isla en la istorya de la fundasyon de Israel. Los britanikos vyeron la izla komo la solusyon perfekta kontra la imigrasyon ilegal Djudia a la Palestina. A un poko mas de 450 kilometros de la kosta israelí, Kıbrıs se izo un sentro de detensyon para miles i miles de Djudios ke fuyeron de la Evropa ma ke fueron defendidos de entrar a la Tyerra de Israel. Ironikamente syenes de Djudios ke aviyan fuyido de la Evropa i yegaron a Kıbrıs en la dekada de 1930 fueron relokados en Israel i Áfrika en 1941, antes de la fundasyon de los kampos de detensyon en la izla.
En 1951, aviya un poko mas de 200 Djudios en la izla. Este shifro kontinuo a abashar asta a unos kuantos anyos antes. Ma despues de relokasyones profesyonales o por razones komersiyales, la povlasyon Djudia en la izla empeso a pujar i una kaza de Chabad fue fundada.
