En la perasha Nitsavim meldamos el kastigeryo ke kastigo Moshe Rabenu a el puevlo djudyo en sus ultimos diyas. A propo de este sujeto, de kastigar a las personas ke no estan en kaminos derechos, dize Shelomo Ameleh en su livro Mishle, mijor es un kastigo deskuvyerto mas ke un amor enkuvyerto. Shelomo Ameleh en este verseto kijo dizir, es bueno i provechozo de kastigar a un kompanyero i enbezarle lo ke es bueno i derecho, i no desharlo en el yerro. La razon es ke el kastigo aze bivir a los ke resiven el kastigo kon amor i plazer. Tanbien dize Shelomo Ameleh en el mismo livro, la milizina de la aluenga es arvol de vidas. La aluenga, la avla ke kastiga a la djente alarga las vidas. El ombre ke va kastigar a su kompanyero deve de avlar las verdades. La kontra de estas palavras si alguna persona del amor ke tyene a su konpanyero no le korija o no le dize sus defektos, a tornarlo a el kamino bueno, le aze danyo grande i no plazer. En nuestra Tora la bendicha, tenemos la enkomendansa de kastigar a nuestros kompanyeros i no desharlos pekar i devemos de amarlos. El primer verseto de la perasha nos dize, “Oy estash parados todos enfrente de el Kriyador”. Los savyos entrepetaron este verseto dizyendo: No te espantes de los kastigeryos, ke vos kastigo Moshe Rabenu ke meldimos la semana pasada en la perasha de Ki Tavo. Si nozotros aplikamos los enkomendansas de la Tora i andamos en sus koreras, el Santo Bendicho El nos esta prometyendo todo lo bueno ke El nos va dar.
El biervo Ayom, oy, oy estash parados enfrente de el Kriyador sinyifika el diya de Rosh Ashana. I nozotros estamos serka los diyas de la anyada nueva. Bushkaremos a azer lo ke es bueno enfrente el Kriyador. Orasyonar de alma i de korason a el Kriyador ke nos de muncho bueno, salud i repozo bueno. Azer teshuva, arepintimyento de los defektos i bushkar meritos. Ayudar a las ke poko pueden. La tsedaka balda la gezera, ansi ke se realiza, el kante ke meldamos noche de Rosh Ashana. TIHLE SHANA VEKILELOTEA TAHEL SHANA UVIRHOTEA.
Ke eskape el anyo kon sus maldisyones i enpese el anyo kon sus bendisyones. Eskritos ke seyamos en livros de vidas largas i buenas.
