No era unos kuantos diyas antes, ke eskrivi ka ya vino enverano? Esta inkreyivle de pensar komo pasaron tres mezes. Parese ke una semana antes eskrivi “Purim Purim lanu”. Agora ya esta para vinir el invyerno. Estavamos en la izla, ya ampesaron a akurtarsen los diyas i ya ampesaron a esfriyar las noches. Metimos las mantas de lana, serrimos los balkones i las guertas para protejarmos del friyo. Los moshkos ya se kudureyaron, no desharon braso ni pacha ke no me moryeron. I mozotros a la fin ya tornimos a la sivdad. Udjula esto pasando nochadas sin araskinas. Invyernada alegre ke tengamos kon sanedad. Amen.
Agora vos kero kontar un evenimyento muy enteresante.
Unos kuantos anyos antes, una famiya desido de azer aliya a Israel. Avlaron kon las otoridades, desidaron la data de aliya, desidaron la data ke van a mandar las kozas de sus kazas kon lift. Se organizo todo. El diya fiksado vino el lift delantre la kaza, los mobles i mas, ya se aviyan ambalajado de mas antes. Se metyo todo al lift de la manera ke ya estavan auzados los lavorantes. Despues ke ya no kedo mas nada afuera, se serraron las puertas i el lift se fue kon vapor a destinasyon Israel.
De otra parte, la famiya tomo las kozas de menesterozas ke se ivan a yevar kon eyos, asta ke iva ayegar el lift. I eyos se suvyeron al avion, destinasyon Tel Aviv. Desharon todo lo pasado, memoryas, amigos, paryentes detras, para ampesar una vida mueva.
Se fueron a sus kazas asperando la yegada del lift. 15 diyas despues vino el lift. Alegriya grande. Los lavorantes avriyeron las puertas del lift. I ke ven? Hop un gato preto salto komo loko del lift afuera. Ke esta afitando? Ke es este gato? La balabaya pishin lo konosyo. Atyo!!! Este es el gato de la vizina turka de Estambol. El guerkito, topo la puerta del lift avierta, en lo ke se estavan kargando los paketos, se enkasho aryetro i kedo aprezado aya. Todo estava muy bien ama komo bivyo 15 diyas sin komer i sin bever? No esta kuryozo? Telefonaron a la vizina turka de Estambol, i eya la povereta estava bushkando a su gato por “montanyas i vinyas”. La mujer se alegro ke se topo el gato sano i rezyo. Ma no aviya ke azer. I el gato aviya desidado de azer aliya al pareser.
Agora en Israel ay un gato turko dolasheando por las kayes sin pasaporto i sin viza.
