La fin del enverano para unos dentre mozotros es una tristeza, es una pena. Yo penso ke munchos preferan el enverano al otonyo. Los tyempos kayentes, el sol briyando, el syelo sin nuves i la mar limpya dan a la persona la alegria de bivir i de ser optimistos mizmo ke la situasyon no esta briyante.
El eskrivano fransez famozo, Chateaubriand, aviya dicho: “Kereriya dar dos otonyos por un enverano”.
El enverano es una sezon ke se bive kon muncho gusto porke los dias se alargan, kaji todo el tyempo pasa afuera en las kayes. La natura se aribive, la kolor de las vedruras i de las flores repozan el umano.
Al kontraryo, kuando vyene el otonyo, los dias se akurtan, el tyempo ampesa a yelar, las luvyas, las noches areskuras, el ayre, las kolores amariyas de las ojas de los arvoles mos dan una tristeza.
Mizmo kon estos puntos negativos el otonyo es una sezon muy emportante para mozotros los djudyos.
“Rosh-Ashana” es la fyesta de las mas emportantes, ke es el empesijo de una anyada mueva para mozotros, “Kipur” i “Sukot”, todas estas fyestas son en el empesijo del otonyo. El mez de Elul es un mez sakro para los djudyos del mundo entero. En esta perioda mueva devemos de enterojarmos i de krear kozas muevas, buenas relasyones kon el entorno por egzempyo.
En mirando i pensando al anyo ke paso, devemos de topar lo ke keremos de aryento del korason para pueder realizarlo.
Los pasos pozitivos sovre todos los sujetos, mos ayudan a avansar para el desvelopamyento personal sovre las partikularidades del karakter, sovre los penseryos, i el komporto.
Demandamos pardon de todo lo negativo ke akumplimos mizmo sin kerer, i azemos esforsos para trokar i akseptar todos los evenementos ke van a ser para muestro hayre.
“ROSH ASHANA”, el dia de la kreasyon i del
djuzgamyento de la persona, del umano.
Kada Rosh Ashana, anyada mueva traye kon eya, muevas esperansas, muevas deskuvyertas i muevas reushidades en todo modo de espasyo.
Kada anyo muevo es un presipyo ke kontyene la emosyon, la pozitividad i la stabilidad entre los paizes.
Avlando de Rosh-Ashana, me akodri de una tiya (zihrono livraha) ke mos kontava konsejas i evenementos i rekuerdos ke se aziyan en las fyestas.
Komo por egzempio; se tomava una kanata yena de agua, i se metiya delantre de la ventana afuera.
Esta kanata noche entera tomava las luzes, las ermozuras, las buendades ke viniyan del Dyo; i al otro diya; toda la famiya deviya de lavarse la kara kon esta agua bendicha yena de ermozuras, para ke el anyo entero seyga yeno de evenementos orozos, i sanedad.
En el empesijo del anyo muevo, tomaremos desizyones komo; kerer BYEN al den frente mas muncho sin ver sus yerros, dar AMOR al entorno i okupar de los ke tyenen menester de muestro APOYO.
Tendremos solidaridad entre mozotros, mos adjuntaremos en muestras ideas i muestros aktos, i ke syempre la LUZ de la ESPERANSA ke tenga lugar en muestra VIDA.
“SHANA TOVA”, “HAG SAMEAH”.
