Esta semana vos va kontar syertos puntos sovre la politika eksteriora de la Turkiya. En primero ke todos los ke sigen las medias i la televizyon estan informados ke la Turkiya o el prezidente Erdoğan esta azyendo esforsos para ke muestro payiz tome rolo en la sima de kolaborasion de Shangai ande se topan los Chinesos, los Rusos i un alay de payizes. Reelmente no savemos si es bueno o no para muestro payiz. Es djusto ke lavorar i ser en el mizmo lado kon los Estados Unidos no es muy kolay. Porke lavoran komo pensan. I pensan en el provecho de sus propios payizes. Estan dando armas al Kibris del Sud i no konosen al payiz ke se topa en el norte los 48 anyos dalkavo. Komo era ofisyer en la Armada Turka i estava en Kibris del norte, ya konosko bastante este payiz i los enteresos de kada uno. Todos saven ke estos dos payizes ayudan la djente para deskulpar la moneda illegal. I los payizes Evropeos i los Estados Unidos azen todo sus posivle para ayudar este payiz, el Kibris del sud. Dizen ke la Rusia i Putin van a achetar la egzistensya del Kibris del Norte.
Esta semana es una perioda muy emportante en las aktivitades de la diplomasia. Munchos primer Ministros, prezidentes de la Republika i ministros de los Echos Estranjeros se topan en New York para los lavoros de los Estados Unidos. I la Turkiya esta presente kon una delegasion bastante ancha. La mas grande diferensya entre este anyo i los anyos pasados es ke la Turkiya, komo tyene mas buenas relasyones kon Israel esta azyendo esforsos para amijorear sus relasyones kon las Institusiones Djudias ke se topan en los Estados Unidos i ke son muy emportantes para las relasiones Turko Amerikanas. I savemos ke las relasiones entre muestro payiz i Israel djuga un rolo muy emportante. Esta vez los dos Prezidentes de muestra komunidad, los sinyores Kohen i Ibrahimzade van a estar en New York para ke estos enkontros se realizen kon los enteresos de las dos vandas. Reelmente en los 90 i en los 2000, estas enstitusiones tenian muy buenas relasiones kon muestro payiz. Ma syertos evenimyentos dyeron danyo a estas relasiones. Mozotros, Djudios Turkos keremos ke las relasiones entre la Turkiya i Israel i las relasiones entre la Turkiya i las Institusiones Djudias Amerikanas sean en un nivel bastante alto. Esperamos ke esta semana mos va ayudar bastante para este resultado.
