Los emigrantes judios fueron los fondadores de los prensipales studios de Hollywood. Kualo enspiro tantos judios a unirsen a la endustria sinematografika temprana i kualo fue su influensa a la kultura de los Estados Unidos? Munchos de estos judios eran vinidos de vodevil i del komerso de vistimyenta; dos endustrias ke los judios eran permetidos de azer.
Los teatros de vodevil prezentavan spektakulos de modos diferentes: un kantador, un akto de animales, un palyacho etc. Los teatros de los barrios de emigrantes aparejavan spektakulos en diferentes linguas, inkluzo yiddish. Estos spektakulos eran atraktivo para los emigrantes i los presios de las entradas eran baratos. La klase alta kristiana, desdenyavan el vodevil. Los kristianos no izyeron nada para mantener los empresarios judios afuera del negosio.
Munchos de los emigrantes judios ke teniyan abilidades de kustura, prosperaron de manera similar en la industria de la konfeksion. No aviya menester de muncha kapachedad, ni paras para avrir una chika fabrika de ropa.
Kuando se introduizaron los filmos a la fin de la dekada de 1890, el sukseso de esta mueva endustria teniya menester munchas de las mizmas abilidades ke el vodevil i el komersio de vistimyenta. El arte de vender era lo mas emportante: los produktores de sinema teniyan menester de vender sus filmos a los patrones de los sinemas, i los patrones de los sinemas kaliya ke vendyeran los biletos al publiko. Por egzemplo, Carl Laemmle vendiya ropa antes de fondar Universal Pictures. Adolph Zukor vendiya kueros antes de fondar Paramount Pictures, i Jesse Lasky, uno de los haveres de Paramount, era un trompetisto de vodevil. I uvo munchos otros, komo Shmuel Gelbfisz ke troko su nombre a Samuel Goldwyn kuando desho el echo de vender guantes i entro al negosio del sinema.
Estos empresarios judios-amerikanos tuvieron sukseso porke los filmos se izyeron muy populares. Los kristianos rikos no kijeron ver estos filmos. La djente ke se ivan al sinema eran los lavorantes i los emigrantes: las entradas eran baratas i komo no aviya avlar en los filmos, no era menester de saver linguas. La klasa elit kultural estava pensando ke esto iva ser una moda pasajera. Las enstitusiones katolikas estavan diziendo ke los filmos ivan a tener una influensa korruptura al publiko. Ma, los judios no estavan afektados de nada. Eyos estavan afektados solo por el antisemitizmo. Eyos keriyan abrasar el publiko entero i deshar atras el antisemitizmo del Viejo Mundo.
Los patrones de las kompanyias de produksion keriyan engrandeser sus kompanyias. El chiko studio Metro Pictures se adjunto kon Goldwyn Pictures, i el nombre se troko, se izo Metro-Goldwyn-Mayer.
Los studios de Hollywood minimizaron las diferensias kulturales i relijiozas. A la fin, los filmos se konvertieron en una mueva identidad kultural omojena ke iva abrasar el publiko entero. Los filmos prezentaron una vizion de ‘Great Melting Pot’ ke la sosiedad de la Amerika keriya ser. Los empresarios judios finalmente enventaron la kultura de los Estados Unidos del venten siglo.
En la dekada de 1960, los studios de Hollywood estavan aziendo filmos mas karos i mas grandes. Los patrones de los studios vendieron sus kompanyias a kompanyias mas grandes para protejarsen de los rizikos.
Los temas de los filmos trokaron. Los filmos kontaron istorias sovre el amor por la famiya, la sosiedad i el paiz. Istorias sovre komo ganarse la vida onestamente en lavorando duro i administrando su negosio de manera djusta. Istorias sovre protejar los ke no son poderosos i kombatir los tiranos. Istorias sovre la fe, la esperanza, la sanedad, la verdad, la djustisia i el stilo amerikano.
