Keridos Korelijionarios,
Estamos entrando a un nuevo anyo fiestando el “Rosh Ashana” al empesar de la tadrada de Alhad el 25 Septiembre i en segida arivamos al “Yom Kipur” el 5 Oktubre i desde el 10 Oktubre fiestamos “Sukot” i “Simhat Tora” donde sueto ke mos sean kon sanedad i prosperidad i ansi se termina el periodo de “Yamim Noraim” ke kaji mos apregona el Otonyo.
“Baruh Sheehiyanu Vekiyemanu Veigianu Lazeman Aze”
Klaro ke el mez de Tishri de nuestro kalendario ke estamos a su entrada es un periodo yeno de orasiones i suplikasiones ke kon todo esto es tambien la oportunidad la mas apropriada por todos nozotros para korijar nuestra kondukta verso los preseptos de nuestra Santa Tora. Penso ke la fraza:
“Arhek Midarhe Bene Adam Veshur Darhe Gevoeha”
“Aleshate de uzos Umanos i Torna a Preseptos de El Santisimo”
ke resitamos munchas vezes en nuestro “Selihot” mos yama a todos nozotros para kompletar lo nesesario ke es el arrepentimiento.
Es verdad ke en estos dos anyos ultimos estuvimos muy molestados seya komunalmente i seya individualmente a kavza de la Pandemia. Siendo ke ya alkansimos a estos diyas mas kalmos, puedemos partisipar en las orasiones sinagogal i partajar nuestros mijores sentimientos.
Keridos Ermanos,
Siendo ke semos los eredores meresientes de una kultura kompuesta de un modo de bivir desde kuarenta siglos, devemos de konservarla kudiadozamente i transmeterla a las jenerasiones venideras.
“Ki I Hohmathem Uvinathem Leene Aamim”
“Ke Eya es Vuestra Saviduria en Ojos de Puevlos.”
Esto bien konvensido ke el metodo el mas adekuado en este kampo es de stimular a nuestros ninyos de estudiar en nuestra eskola ke verdadmente okupa un buen nivel de edukasion entre las eskolas de nuestra sivdad.
Keridos Korelijionarios.
Siendo tambien ke semos una kolektividad relativamente aedada i amenguandose, es bien importante de organizar i giyar nuestras institusiones, fondasiones i los fondos kon lo mas muncho posivle kudiado i konforme a las kondisiones kontamporaneas. Esto rengrasiando i agradesyendo a nuestros prezidentes i dirijentes akeyos ke estan fonksiyonando kon grande abnegasion en este kampo todo en akompanyandolos kon mis bendisiones i vos rogo tambien de darles vuestra mano de ayudo kon el maksimo posivle.
“Vekulam Yitbarehu Mimaon Aberahot”
“Todos Seyan Bendichos por el Manadero de Bendisiones”
Keridos Ermanas i Ermanos,
En estos diyas ke estamos por resivir la 5783en anyada de nuestro kalendaryo, esto rogando a El Todo Poderozo ke mos regale una anyada de salud buena, pas i plena prosperidad en un mundo sin deskriminasion ni odio todo en yamandovos tambien ke me akompanyesh kon vuestros rogativas.
Estando yeno de estos pensamientos i sentimientos vos sueto una anyada de salud buena, de pas, repozo i prosperidad kon todos vuestros keridos todo en bendizyendovos kon las bendisiones de nuestra Santa Tora.
“Leshana Tova Tihatevu”
“Tizku Leshanim Rabot”
Rav İsak HALEVA
Gran Rabino
