Ke puede pasar si el Djudyo se va a bivir i enstalarse en la Luna o Marso o una otra planeta? Komo va azer kon sus tradisyones de la Alaha?
Kuando el primer ombre kamino en la Luna, mi nona me diziya “Ayde boviko, te están enganyando. Komo es posivle ke una persona va kaminar en la Luna?”
Oy savemos ke este enganyo se realizo i un diya vamos a ver koloniyas de personas en la Luna o Marso o una otra Planeta. Por seguro ke mis anyos no me van a permetir a ver ke esto se pudo realizar, ma mis inyetos kreyo ke si, van a pueder verlo. Oy kuando dizimos “ya paso al otro mundo”, amanyana esto se va dizir no por la muerte ama por una otra Planeta ke la muestra. Pensando ke esto se va realizar, el Djudyo komo va bivir si kere kumplir sus doveres de la Alaha. Si kere azer tanid el diya de Yom Kipur o de Tisha be Av, komo va kontrolar el kalendaryo. El astronot, Luca Parmitano, en la Estasyon Enternasyonal del Espasyo (ISS) dize ke en un diya de 24 oras, vieron el sol ke nasyo i se echo 16 vezes. Si kere komer según kasherut, ande va topar la gayna, el pishkado, el kodrero, la vaka ke biven en la Tyerra.
Ribi David Lister, un Haham de Londra, eskrive en su livro «Intergalactic Judaism» ke no deve de aver dingun konflikto entre el estudyo de la Siensya i el Judaismo. El Haham Lister mos dize ke la Siensya es la akumulasyon de la saviduriya. Komo el Judaismo aksepta ke el Kriador es el mas poderozo savyo kon una saviduriya sin fin, toda inovasyon i todo deskuvrimyento de la siensya no va ser kontra los eskritos sagrados. Ama para munchos pensadores, el Djudaizmo no puede egzistir afuera de muestro Mundo porke para estos pensadores, el Djudaizmo es la forma de relasyones entre el Kriador, la Umanidad i el Mundo. I la Alaha fue eskrita por la Tierra Santa i no por los mundos afuera del muestro. De otra parte, si a los viajes astrales el Djudyo no va partisipar por modo de la Alaha, es ke en el futuro no vamos a ver Djudyos en las otras estreyas. No olvidar ke el trokamyento del klima va ovligar la umanidad a bushkar refujyo afuera de muestro Mundo.
A la fin, puedemos kreyer ke el Bet Din Mondiyal va topar la solusyon de permitir a los Djudyos de bivir en el futuro en un otro Mundo ke el muestro de oy.
