Anyada buena a todos. En muestra sivdad es de uzansa embiyar kartas de las ovras a sus amigos o a sus paryentes kada fiesta. I las ovras lavoran para realizar muevas kartas, regalos ke no se realizaron antes por las ovras. Komo era prezidente de muestra komunidad, syertas personas mos embiyan un alay de dulsuryas i todas una maraviya. Ma malorozamente no pensan ke una persona koma mi ke tyene bastantes kilos i ke le plaze todo modo de dulsuryas esta gerreando para komer lo mas poko. El Or Ahayim ke prezenta sestos kon vinos, dulse i todo modo de dulsuryas prezenta los regalos los mas pahpahlis. Anyos i panyos un dirijente de muestra komunidad kon su mujer mos embiyo el regalo el mas mostrozo. Agora es uno de los prezidentes de muestra komunidad ke mos esta embiyando el regalo asemejante.
La Mishne Tora produse masapanes kasher anyo entero i para Pesah produse grandes kuantitates de masapan. Tyenen un atelye para esta fabrikasion. En Rosh Ashana venden shokolas kasher ke son produzidos en una fabrika ke es kontrolada por los hahames. Ay otras ovras ke prezentan todo modo de regalos. Kuando era mansevo era solo el Fakirleri Koruma ke embiyava kartas trenta o kuarenta anyos antes. Me akodro ke en la kacha avia un motif de muestra amiga Esti Saul, ke su alma repoze en Gan Eden. Era por la primera vez ke avia visto una koza asemejante.
Kuando lavorava por el Şalom se dyo karar ke puediyamos embiyar livros al lugar de las kartas. I kon el tyempo ke paso i kon los esforsos de Gila Erbeş, este fue un evenemento. I oy en diya, en kada fyesta kreo ke en el Şalom embiyan syenes de livros. Esto tyene dos provechos. El primer es de valorizar los livros ke fueron publikados i el segundo provecho es de dar la posibilidad a la djente de pueder meldar muevos livros. Si tenesh el livro ke vos fue prezentado tenesh la posibilidad de pueder trokar el livro. Syertos anyos el Sentro Sefaradi i el Muzeo Djudio izyeron la mizma koza para pueder prezentar sus muevos livros.
25 anyos antes, kon los livros publikados en la republika Turka izimos una ekspozisyon en la biblioteka Atatürk en Taksim por los 75 anyos de la Republika Turka. I en esta ekspozision avia dos vitrinas kon todo modo de kartas ke fueron publikadas. Espero ke vamos a realizar una otra ekspozisyon en el Muzeo Djudio kon todas las kartas ke fueron publikadas.
