Este enverano estuve muy poko en la izla Büyükada porke me suvi al barko de mis ijos, i bivi 2 mezes en el barko kon eyos.En primero les dishe ke yo no va pueder bivir en el barko tanto tiempo. Mi ija me disho, "si te enfasyas, u bien si te viene difisil de bivir en el barko, te va abashar ande keres, te va meter al avion i te va mandar a Estanbol".Me yerri porke topi muncho plazer. La mar es una pasyon muy grande. Mi inyeto chiko, Leo es una kreyatura muy sosyal i simpatiko. Kuando akostamos en un bodre, el se echa a la mar, se va en nadando al barko ke esta serka de mozotros, i les demanda: "Burda 11 yaşinda çocuk var mi?" (Aki ay kreatura de 11 anyos?). Una vez, la repuesta ke aresivyo fue: "12 yaşında var, sana uyar mı?" (Ay de 12 anyos, te uydeya a ti?) Leo le respondyo "göreyim" (lo vere). El padre yamo a su ijo. Kuando Leo vido al ijiko le disho "olur" (si) i se suvyo al barko de eyos. Yo no esto muy repozada. Porke era un barko muy grande, i Leo entro aryento i no lo esto pudyendo kontrolar. Ya asperi 10 puntos! Ya asperi otros 10 puntos, kuando vide ke no salyeron ahuera, me echi a la mar, nadi fina el barko; i les demandi "Burda 70 yaşında biri var mı?" (Aki ay una persona de 70 anyos?) Ha ha ha! Siguramente ke no les dishe, es para azervos riyir ke vos eskrivi ansina. Ampesi a avlar kon eyos para konoserlos un poko. I yami a Leo komo si le va demandar una koza. Leo estava muy kontente; estavan djugando kon el komputer en un ekran grande un djugo. Este modo me arepozi i nadi atras a muestro barko. En la mar se esta azyendo amigos muy presto. No paso una ora, mos mandaron del barko de allado una tart de frezas kozida akeya ora. Komimos la tart kon un kafe oras de tadre, esto era un keyf muy grande.
