En muestro echo i kreo en los echos de los otros, kuando una persona va realizar sus vakansas, aze syertos yerros en el echo ke lavora. Kreo ke es de la emosion de las vakansas. O syertas kozas no se realizan, i vemos lo ke esta manko kuando no esta en el lavoro… I a mi reelmente no me plaze kuando los ke lavoran se van en vakansas. Ay una koza ke falta. I kuando no esta, bivimos syertos problemes. Es la mizma koza para mi!
Mi mujer me disho ke tyene de menester de azer vakansas para entrar a la mar. Ma no es muy fasil. Deve de topar una agua muy limpia. I esta vez me disho ke mos puedemos ir a Hillside. Hillside es un kazal de vakansas. I los 30 anyos dalkavo no troko nada aya. Para los ke no saven, es una aktivitad profesyonal del Grupo Alarko. I es dirijado por el Sinyor Edi Ilkbahar ke era miembro de un klub 50 anyos antes. I el era diskjokey.
Oy en diya komo todo el mundo, la Turkiya esta teniendo un alay de problemes ekonomikos. Dizen ke la elektrisita va pujar 4 vezes i el gaz natural no se kuantas vezes. Deviamos de bivir un problem reelmente muy emportante.
Lunes pasado miro en el internet, i malorozamente no ay lugar en dingun avion para Dalaman - lugar serka de Hillside. Mi mujer devia de irse 5 o 6 semanas antes al mizmo lugar, ma komo aferro la Corona, no se fue i devia de emplear el bilyeto de avion. Ma es muy yuch. Mos fuimos endjuntos al buro de la Turkish Airlines a Elmadağ. No ay lugar en los 7 o 8 volos de los diyas (ir i vinir) ke keriamos. A la fin kon los miles alkansi a tomar dos lugares business. I por tornar avia lugar solo en el volo de las 23.55. Este modo pasimos 4 diyas maraviyozos aya. Agora esto eskrivyendo mi artikolo en el aeropuerto. I vos puedo dizir ke tyene un retar de medya ora. Espero ke vamos alkansar a bolar medya ora mas tadre…
En el Hillside no avia lugar. Bushki a un amigo i le dishe ke me keria ir solo 4 diyas a Hillside. Me disho ke no ay lugar, ma ke me va ayudar kon las primeras kamaretas ke van a ser anuladas. I dos diyas despues mos achetaron. Es uno de los mas karos oteles de esta rejion. I pishin embiyi las paras. Kon estos presios vos djuro ke kada kamareta estava yena en el mez de oktobre i los aviones yenos.
Vos avia eskrito en otros artikolos ke ay dos Turkiyas: la Turkiya rika i ka Turkiya prove. Es una situasion ke no aprovo. Vos kero avlar un poko sovre el Hillside; kreo ke es el kazal de Vakansas el mas luksuozo. Kualo kere dizir luksuozo: en las kamaretas todo esta djusto. Ya puedesh pensar ke mas de mil personas tornan a las 6 de la tadre a sus kamaretas i todo el mundo toma una dush. I la agua kaynte abasta para todos. Kada detalyo es kalkulado en las kamaretas i no falta nada. Ay un aparey detras de las puertas en vitro de la tualet i de la dush para ke no se rompa kuando se chaftea la puerta. El air conditioning, los kanales de television para los turistos de kada payiz lavora sin dinguna falta. Kada anyo azen reparasiones para ke los klientes topen el konforto ke keren kuando vyenen. Ay turistos Israelyanos, Alemanes, Inglezes, de los payizes del Norte de la Evropa i munchos otros payizes. La djente sale muy kontente de este kazal de vakansas. I azen un mijor presyo para el ke viene por la segunda vez, la tresera vez, la kuatrena vez … Ma malgrado su presyo alto, los sivdadinos turkos azen todo sus posivle para pasar sus vakansas aya. Este enverano s’eskapo. Al anyo ke viene: “bivir i ver”…
