“Eskuchad los syelos, las palavras ke esto avlando, i oyid las dichas de mi boka”. Ansi enpesa la perasha de Aazinu kon las palavras de Moshe Rabenu. Ansi Moshe Rabenu se aderesa a los syelos ke el estava serka de los syelos, por razon ke ya se aserkaron los ultimos diyas de su vida. Un poko mas el ya se iva apartar de este mundo materyal, i se iva ir a el mundo vinidero. Por esta kavza enpeso, i se adereso a los syelos. I despues se adreso a la tyerra. El tomo por testigos a los syelos i a la tyerra. Si el puevlo Djudyo non va sintir las palavras de El Kriyador, no va andar en sus kaminos, los syelos i la tyerra van a dar testimonyo por sus non buena kondukta. I el eskopo ke Moshe Rabenu tomo por testigos para testimonyar la kondukta del puevlo Djudyo, a los syelos i a la tyerra, para ke sean firme todo tyempo ke el mundo egziste.
En kavzo ke el puevlo Djudyo no va estar korrekto kon El Kriyador i kon su ley santa, estonses los syelos no van a dar las luvyas i las tyerras no van a dar sus produktos. Komo lo meldamos en la Shema, no va aver luvyas i la tyerra no va dar produkto. Nuestros savyos dan tambien otra razon sovre este sujeto. Kijo dizir Moshe Rabenu mirad a los syelos i a la tyera si eyos salen del orden del patron de el mundo. Los syelos syempre dan las luvyas i la tyerra su produkto i no trokan de sus naturas.
El mundo se sostyene por el merito de la ley, i de sirvisyo a El Kriyador, i sovre la bienfezensya. Si semos korektos, en estos pilares sakros egzisten en el mundo vida repozada i la luz de los syelos es la Tora. Por el merito de la Tora egziste en el mundo el repozo. David Ameleh en el livro de Teilim dize: “ El Kriyador nuestro sinyor, ke fuerte es tu nombre sovre el mundo. Tu das la ermozura a los syelos. Ansi da de tu ermozura a la djente. I da de tu luz a los enbezantes tu ley santa. Por la boka de los chikitos i mamantes enforteses los simyentos de el mundo”. David Ameleh kijo dizir la Tora ke se enbezan los chikos i se syente de sus bokas, se sostyene el mundo. El Kriyador ke nos de la fuersa i la enerjiya de azer teshuva kumplida, i este Shabat ke es Shabat Teshuva a El Kriyador ke nos nombre a nozotros i nos de vidas largas kon salud buena.
Gemar Hatima Tova.
