En el mundo entero estamos vyendo i realizando munchos problemes. Por egzempyo, ya es el sejen mez de la gerra entre la Russia i Ukranya. Pekado i manziya del paiz, de las personas ke se estan fuyendo de la Ukranya, famiyas, mujeres i los ijos, ijas. Malorozamente los ombres no tyenen permisyon de salir afuera del pais. Una desgrasya!...
Ukranya ya se destruyo, las famiyas estan desparesidas, unos por aya, otros por aki. No se tyene visto este modo de gerra kon tantos muertos, i sangre desde la sigunda guerra mondial fina oy.
Esta gerra influenso no solo la Evropa, ma el mundo entero en trayendo los dezaztres globales komo los alimentos, ke estan muy karos i no se estan topando.
Estamos bivyendo este dezaztre ke mallogro las ekonomiyas de todos los paizes.
La enflasyon, el problem de la subsistensya i la mankura de los alimentos son problemes ke no son fasil de rezolver.
El Medio Oriente es una de las rejyones las mas afektadas por la kriza alimentarya.
No se esta puedyendo alkansar a los presyos del petrol, de la benzin… Esto esta enfluensando las ekonomiyas de los paizes. La China va ser el pais ke va tener el mas grande profito de este kaos.
Agora desharemos la politika i avlaremos un poko de la kultura.
“Moris LEVİ” el “Vice Presidente de la Komunidad Djudiya Turka” eskrivyo un livro muevo intitulado “Setenta Novias kon Velo” (Yetmiş Duvaklı Gelin).
El eskrivano remersyo en el prefasyo del livro,
İshak İBRAHİMZADEH, ke es el kopresidente de la komunidad djudiya, ke fue el enspirador para eskrivir este livro presyozo.
Presyozo porke eskrivyo las diferentes Perashas ke aviya arrekojido ke estan relasyonadas kon kuentos, istorias diferentes ke tyenen un senso profondo.
En el livro ay munchas palavras savias.
“Los umanos se sonyan, meten un objektivo a sus vidas, azen un plano i se meten al kamino de la vida. Ma, nunka no se save lo ke se enkontrara en el kamino del universo. Las sirkonstansyas i los motivos umanos krean muevas perspektivas, muevos puntos de vista, muevas leyes”. En munchos lugares esta eskrivyendo la emportansa de muestras tradiyones, i de las kestyones ke esta demandando la mueva jenerasyon.
Dyo grande emportansa al byervo "ayuda". Prefero la palavra "solidaridad". Tambyen ekspliko ke komo ay una relasyon orizontal en la solidaridad, ekspresa i el respekto.
Moris Levi esta dizyendo ke, “A la vida no le importa la identidad. Todo modo de uniforma, titolo, poder u edukasyon son inutiles a menos ke se uzen de manera onesta”.
Moris Levi eksplika kuando todo esta pedrido, la rikeza es una karga muy doloroza, la liberta es la soledad i la reushidad alkansada kon ambisyon es no ser amado.
Los ke son kuriozos de saver muestras tradisyones, los ke keren meldar istoryas i kuentos agradavles deven de obtener este livro i meterlo a sus bibliotekas.
“La enformasyon se pudre si no se komparte”.
Felisitasyones a Moris Levi por esta ovra presyoza ke meldi kon grande plazer.
