La vida esta pasando kon una rapidez inkreyible, korriendo, lavorando i bushkando momentikos para ser orozos. La dicha, “salud, amor i pesetas”, sin pareser tiene una filozofia simple i verdadera. “Una mente sana, se topa solo en un puerpo sano” dize Kemal Atatürk, porke kon la salud se puede empesar a konstruir una vida normal. Serka de tres anyos, el mundo entero esta gerreyando kon la pandemia del Covid-19. Se pensa ke, non ofisialmente serka de 18 milyones de personas perdieron sus vidas. (Ofisial 6 milyones). Komo semos una jenerasion de “high tech” i ke no vimos ni gerras mondiales, ni pandemias, no supimos la valor real de la salud. Kreyo ke kon esta pandemia, realizimos, mansevos i aedados, ke la salud es la kalidad la mas importante de muestra vida. Kudya a tu salud, tu intelekto, tu fizyonomia para pueder bivir kon enerjia, para pueder lavorar i mantenerte, para bivir kon gusto i kon amor.
“Ande ay amor, hay vida” dize Mahatma Gandi. El amor es uno de los temas mas tratadas en el mundo aktual. La literatura, el sinema, la muzika, las relasiones de kada dia estan bazadas en la nosion del amor. El amor es un sentimiento, o una emosion fuerte por una persona o un grupo de personas komo la famiya, los amigos, los animales domestikos etc... Para amar al otro, en primero devo de amarme a mi mismo i esto sirve komo una yave para tener relasiones benefisiozos. El projeto de amar es un kontrato personal, ke lo azemos kon mozotros mizmos, kon muestras relasiones, kon la vida. Tomar konsiensia, ke la vida mos apartiene i ke keremos bivir bien, es el primer projekto de amor. Todos tenemos la kapasidad de amor i koneksion, de sentirmos parte del universo, de la umanidad, i de la natura. Dar i resivir amor, dar plazer, i kontribuir para azer un mundo mijor, produse el bienestar de la persona i sirve komo una fuente de salud. Albert Einstein dize “Bivimos en el mundo kuando amamos. Solo una vida bivida para los otros merese la pena de ser bivida” i yo digo ke “una vida bivida para los otros, djuntos kon los otros vale la pena de bivirla”.
El motor del mundo, las “pesetas”, komo mozotros dizimos las paras, no siendo una garantia para ser orozos, sirven a rezolver munchos problemas. Woody Allen dize “la moneda no sirve a ser orozo, ma prokura una sensasion tan semejante ke tienes menester de un spesialisto para saver la diferensia”. Un dia, un amerikano me disho “Money deserves respect”. En el empesijo no lo entendi bueno, ma pensi ke la manera de gastar es muy importante. Para tener independensia ekonomika i no tener menester de los otros, devemos de azer un plano i gastar solo para ameliorar muestra vida i gozarla kon salud.
Vos oguro aynada buena kon Salud, Amor i Pesetas i Tiempo para gastarlas”!
