Las fyestas trayen a la vida sus rikezas. Las fyestas son de rekojer la famiya en el entorno de una meza. Kuando mos arekojemos chikos, grandes me plaze eksplikar la valor de la fyesta. Lo ke se inche a las orejas, lo ke toman a sus korasones.
Agora ke estamos en los diyas de Sukot, me meti a arefreskar lo ke se, para eksplikar un pokitiko a los chikos. Tambyen kije partajar kon mis lektores.
Suka es salir de la area komfortavle de muestras kazas i entrar syete diyas a la suka para partajar lo ke tenemos en la mano i en la meza. Es un kamino interyor sovre salir de muestros egoizmos i dar kerensya sin pensar tomar atras.
En estos diyas estamos deshando de djuzgar a las personas ke mos vyenen diferentes a mozos. Kon eyos mos enrikesemos i mos aunamos. Ke keren dizir estas palavras? En esta fyesta etrog, adas, lulav i arava se adjuntan en la mano. Estos kuatro sinyifikan a las personas diferentes i tambyen la refua del benadam.
Etrog tyene una savor i un guezmo ermozo. Es la persona savia. Se ambeza la Tora i la interyoriza. Su saviduria se reflekta en sus komportos. La forma es komo un korason i tambyen sinyifika las hazinuras sovre el korason. Se toma en la mano, es para akodrar ke kale dar mas muncho kerensya al entorno i a la famiya.
Adas tyene solo un guezmo ermozo ma no se kome. Es una persona ke tyene komportos buenos kon su entorno ma no es savido. Adas tambyen sinyifika los ojos i las hazinuras de los ojos. Kon los ojos vemos a las personas i las djuzgamos. Para djuzgar derecho, tenemos menester unos ojos muy buenos.
Lulav es una persona savida ma los komportos son malos. Sinyifika la kolona vertebral. Sinyifika las hazinuras i las dolores sovre la talya. Kuando tomamos en la mano el lulav, sinyifikamos ke vamos ser derechos i kapachis enfrente de las difikultades.
Arava ni tyene un guezmo ermozo, ni tyene una savor buena. Ni se ambeza nada, ni se enforsa para komportos buenos a su entorno. Arava sinyifika las palavras ke salen de la boka. Tomamos en la mano para rekordar ke van a salir las palavras derechas de la boka, no azer lashon ara i no maldizir.
En esta fyesta, estos kuatro simbolos kale tomar en la mano i sentir la influensya ke mos dan a muestros korasones. Tomar estos simbolos en la mano es akseptar las diferensiyas i orasyonar al Dyo poderozo porke estas diferensyas mos ambezan la vida para ir en delantre. Estos kuatro kuando estan endjuntos son “kasher”. Si manka el uno no vale. Kuando se toma el lulav a la mano, etrog i el arava se adjusta lado kon lado, para pasar el karakter del bueno al tuerto. I en las eskolas primeras no es ansina, kon un chiko, ke no le plaze muncho la eskola, no kome, lo asentan kon un elevo mas intelijente i ke kome bueno i le plaze ir a la eskola. Fraguar una suka, es fraguar el entendimyento uno del otro; es fraguar el apoyo uno del otro. Es fraguar una realidad mueva en muestras vidas. Kuando se realiza esta fragua “Suka” sale de ser solo una suka, sale de ser un techo fiziko, se konvierte en muestros korasones a un punto komun.
Rabi Sacks (z”l) mos dize “alegriya es sentimyento muy sosyal” i el Rabi Shraga Simmons mos dize “la yave de esta alegriya esta eskondida en las relasyones reushidas, kon las personas diferentes, kon las relasyones, mismo yo i kon las relasyones kon el Dyo.”
Hag Simha Sameah i Hatima Tova. Anyada buena kon alegriya i kon dulse sin mankura i kon todos djustos.
Referensiyas: Doenyas, N., Şalom (2022)., Essemini R. (2022)., Pasensya M. (2022)
