Viní, eskaparemos de merkar platos i kucharas, kupas i pirones ke se echan al sierkol despues ke los empleyamos.
Ke tienen en komun una noche de fiesta, una noche en la suka, un paseo al bodre de la mar o un piknik en la natura?
Antes, kuando aviya un kazamiento, por ashugar se merkava platos de porselen, pirones i kuchiyos de buena kalidad. La vida de agora ke todos estan en una adjele, mas muncho los mansevos, para no penar muncho i para alkansar a munchos echos enduna, toparon una solusyon mas pratika.
En todos estos eventos komemos i bevemos en chinis i kupas de karton, pirones i kucharas de plastik. I despues los echamos al chop. Oh, ansina no tenemos de yevar atras fregados suzyos i no tenemos yugo de lavarlos i meterlos a sus lugares. Ma, la kantidad de estas kozas son muy grandes kuando se arekojen el anyo entero. Tanbien los sakos ke se uzan a echar a los sierkol son de plastik. I kuando merkamos kozas para komer, estan aryentro de poshetes de plastik. Despues de las mezas de fiestas, piknikes, kumpleanyos, se desha un monton de estos plastikes. En vezes los ke pensan bueno, echan estas kozas danjerozas al sierkol i en vezes los ke no pensan muncho, los deshan en la natura i se van. Sin pensar al mundo de amanyana.
Grandes kantitades de plastikes se topan echados en todos los lugares. Sovre todo en los Oseanos i en la Mediteranea. Tanbien estos sierkoles de plastik nadan asta las rejiones polares, seya del norte o seya del Sud. Kada anyo topan 12 milyones de tonas de plastikes en los oseanos; kere dizir ke kada segundo kaye una tona a las mares. En vezes estos plastikos se adjuntan i se ven komo una izla. Despues de un tiempo, se esparten i danyan a los animales de la mar i mizmo a los animales del doredor. Los animales komen estos plastikes i se aogan o se enfektan. Aparte de esto, los tosigos ke se topan en los plastikes se mesklan en vezes a las aguas ke bevemos, i esto mos aze danyo a la salud.
A la vista, esta situasyon se va agravar kon el tiempo. En una investigasyon ke fue publikada en serka tiempo, dize ke si no aretamos de empleyar estos artikulos ke se uzan solo una vez, en trenta anyos vamos a tener 4 vezes mas de plastikes i tosigos en sirkulasyon.
