Es alhad demanyana kuando me alevanti i tomi la gazeta en la mano i empesi a meldar ke me ambezi ke el ponte kon el kual se puede alkansar de la Rusia a la Krimea, ke fue okupado en 2014 por los Rusos, fue atakado i derrokado. I kreo ke no se puede mas emplear este ponte para embiyar todo modo de kozas (komanyas, kozas de komer, kozas de mantenimyentos, armas…) de la Rusia a la Krimea. Kreo ke es un evenimyento muy emportante para esta rejion del mundo i para kitar loko al prezidente de la Rusia,Vladimir Putin. Los Ukranyanos no izyeron dinguna deklarasion sovre la destruksion del Ponte Kerch ma no ay dingun dubyo ke el ponte fue atakado por eyos.
Kuando la Rusia dyo karar de atakar la Ukrania i empeso a atakar el 24 de Febrero de este anyo, dingunos pensavan ke la Ukrania puediya rezistir a este payis ke reelmente tyene una armada bastante fuerte! Es djusto ke los primeros diyas i mezes, la armada de los Rusos alkansaron a okupar una partida emportante del teritoryo Ukranyano. La mas grande partida de los soldados Rusos eran miembros del ISIS ke izyeron la gerra en la Siria i ke fueron trayidos a la Rusia para ke agan la gerra kon los Ukranyanos. La Rusia pago paras a estos soldados profesyoneles. Ma kreo ke no reusheron. Se dize ke mas de 50 mil soldados rusos toparon la muerte. Ma los Ukranyanos gerrearon para protejar sus payis i tomar atras los teritorios okupados por los Rusos. I reelmente reusheron. Dingunos pensava este sukseso de la Ukrania. El Prezidente Vlodimir Zelenski, ke fue elijido uno de los mas aktivos Djudios del mundo no dyo una deklarasion ke son eyos los ke derrokaron este ponte. No pensavamos en el empesijo de la gerra ke Zelenski puedia ser tan kapache. Ma kuando un puevlo gerrea para protejar i salvar sus tierras, es bastante poderoso. No vemos ombres ni mansevos Ukranyanos ke se estan fuyendo del payis para no tomar parte en esta gerra. Mizmo si ay unos kuantos, no es muy emportante.
De la otra parte vemos ke dospues ke Putin deklaro la mobilizasion miles i dyes miles de Rusos pagaron montantes inkreivles para salir de la Rusia i no tomar parte en la gerra. Ya meldimos en los diarios ke syertas personas pagaron asta dyes mil dolares i mas para topar un fotolyo en los aviones dalkavo. Oy en diya es la Turkiya ke esta achetando lo mas fasil estos Rusos i Antalya oy en diya parese a una sivdad de la Rusia. No savemos kuantos Rusos alkansaron a Antalya. Para alkilar o merkar una kaza se esta pagando unas kuantas vezes mas de lo ke merese.
Kreo ke esto todo se va normalizar si se puede realizar una PAS entre estos dos payizes. Ma no kreo ke sera muy fasil.
