Investigasiones estan amostrando ke 200 miliones de personas en la Amerika i Evropa fueron konvertidas por fuersa.
Agora los desendientes de estos konvertos van a pueder resivir "Sertifikado de Ansestros de Sefarad". Estudios akademikos i jenetikos estan amostrando ke estas personas tienen "rasa judia sinyifikativa" ke remonta a la epoka de la Engizisyon en Espanya i Portugal.
Esta inisiativa empeso por Rekonektar ke es una organizasion del Instituto para la Eksperiensia Judia (ASF IJE) de la Federasion Sefardi Estadosunidos. Esta organizasion es dedikada a ayudar a los desendientes de las komunidades judias espanyola i portugueza a rekonektarsen kon el puevlo judio.
Genie Milgrom, otora, investigadora i jenealojista dokumentó 22 jenerasiones ke se remontan a 1405. Milgrom tambien esta ayudando a los esfuerzos para dijitalizar los rejistros de la Engizision, para los ke estan penando a deskuvrir sus rasas judias. Estos i la enformasion en el sitio web de sertifikasion van a ayudar a los desendientes konosidos komo Anusim, Marranos, Konversos o Kripto-Judios a deskuvrir sus erensia.
Milgrom en una entrevista disho: “El Sertifikado de Ansestros Sefardis es un dokumento istoriko para munchas personas en el mundo entero, espesialmente en Latinoamerika i Norteamerika, ke keren konektarsen kon sus pasado i ke, asta oy, no toparon una posibilidad para azerlo”.
El proseso de sertifikasion va empesar en kompletando un kestionario sovre los antesedantes de una persona, endikasiones sovre su erensia judia, komo tradisiones, arvoles jenealojikos o elementos kon koneksion judia, i sus razones para kreer ke tiene rasa sefardi. Despues, esta enformasion va ser evaluada por un ekipo de ekspertos i investigadores ke van a desidar si el ke se esta adresando tiene bastantes konosimientos para tomar la sertifikasion.
“La identidad de una persona se baza en su pasado, prezente i lo ke kere para el futuro. Muestro objetivo es edukar el mundo sovre la rika erensia, kultura i la neshama del puevlo sefardi. Endjuntos kon Rekonektar, esperamos ayudar a las personas a enkontrar sus rasas sefardis i ambezarsen mas muncho sovre sus erensia”, disho Milgrom.
Ke sinyifika el sertifikado? Mezmo ke el sertifikado no va tener status legal, para los ke van a tomar este sertifikado, va ser un grande sentimyento de orgolyo.
"Vimos ke los ke tienen ansestros judios ke fueron konvertidos kon fuerza, keren muncho ambezarsen sovre sus pasado”, disho Ashley Perry (Pérez), prezidenta de Rekonektar. “Esto es un momento ke forma un paradigma en la istoria judia porke, por primera vez, miliones de personas ke tienen antepasados ke fueron separados del puevlo judio kon fuerza, agora estan topando la posibilidad de bushkar rekoneksion kon sus pasado. El sertifikado ke estamos ofriendo es una forma de konektarse kon su erensia judia i rekonektarse kon su djente”.
Ke pensash? Es ke vamos a pueder ogmentar la populasion judia sefardi?
