En Ermont, Val D’Oise, Fransia, izieron un parko al nombre de Simone Veil, la famoza politisyana franseza. En Septembre, inoguraron un parko en la munisipalidad de Ermont. Ma el problem fue ke la puerta de entrada de este parko paresiya egzaktamente a la puerta de entrada del kampo de eksterminasyon de Auschwitz, ande eya fue deportada en 1944. Manifestaron kon gritos en las medias sosyalas, i la munisipalidad fue ovligada de kitar la puerta de entrada el 11 Oktubre 2022.
Una mueva tabela de tavla va ser metida en serka por la munisipalidad.
Esta entrada ke fue metida para akodrarmos de la famoza politisyana, tuvo un efekto al aroves en la media sosyala. Sigun lo ke mos ambezimos un jurnalisto metyo en Twitter una fotografiya ke eksito el puevlo. Este jurnalisto eskrivio a este sujeto un artikolo “empresionante”, markando ke esto era una verguensa del pasado i akuzando de immoralita el eskojo de la munisipalidad.
Sovre esto empeso en el internet akuzasyones, a la sivdad de Ermont. A la fin fue ovligada la munisipalitad de kitar esta puerta de entrada del park, ande aviya el nombre de Simon Veil. La munisipalitad embiyo una deklarasyon en dizyendo ke no se deve de ver en esta tabela dinguna asemejansa malintensionada kon el pasado i ke la komunita judiya eya mizma se enkanto de esta polemika. La mueva tabela ke vana meter va amostrar la atrositad de los nazistos.
Vos kero akodrar ke Simone Veil paso 4 mezes en este kampo nazi de ekterminasyon. Aya aviya pedrido sus paryentes i su ermano. Eya se salvo kon sus dos ermanas.
