Kuando avlamos de la antiguedad, kada uno de los puevlos komo los ejipsyos, los sumeryos, los asiryos, los romanos o los chinos teniyan kostumbres diferentes para yevar ropa interyor i para vistirsen. Segun los freskos ke tenemos, vemos ke las mujeres romanas, al kontraryo de otras sivilizasyones, uzavan lo ke se yamava “stofion”, banda ke kuvriya los pechos i se atavan por detras. Lo mas de otros puevlos se metiyan lo ke yamamos oy una forma de “peshtemal” .
La vestimyenta de los ombres era muy rudimentarya komo la momya ke fue enkontrada en los Alpes, entre Austriya i Italya, en un lugar yamado Ötztal a una altitud de 3200 metros. Por esto la momya se yamo “Ötzi” i debasho de la inyeve kedo tal komo se ve en la foto. La vestimyenta era: Kuero, fibra, tela sin kortar i sin kuzir, unido por algun tipo de brosh, toka.
Por miles de anyos, la ropa de los ejipsyos fue de Keten (Lino). Komo el klima de este payis es syempre kayente, el keten livyano i fresko fue muy apropriyado. En Gresya, empleyavan el “Kiton” ke era una tunika formada por dos rektangulos de tela unidos por los ombros. En el imperyo romano se vistyeron la “toga”, una tunika, i se metyeron “sandalyas” por kalsados. La ropa era de keten i segun el rango, de seda.
Se puede dizir ke la vestimyenta es vyeja de mas de 150.000 anyos. A parte del friyo o de la kalor, el umano se vistyo tan byen para anunsyar su rango sosyal.
Vinyendo a la ropa ke tenemos aryento de la vestimyenta, es difisil de saver desde kuando la uzamos. Porke esto por siguro empeso kon la nesesidad de proteksyon i de salud. Mas despues se adjustaron las restriksyones de las relijyones. Uno de los motivos de tener ropa interyor fue tan byen las kondisyones del trokamyento de klima. Oy dainda puedemos ver tribus ke biven tam desnudos
Oy la vestimyenta depende de la moda, mas i mas por las mujeres ke se visten fustas kuando largas, kuando kurtas. Al empesijo del siglo 20, la mujer entrava a la mar entera vistida. Oy es una verguensa si no tyene un bikini o un mayo livyano.
La vestimyenta es komo meldamos en Kohelet: “Nada de muevo debasho del sol.”
