En estos diyas de las fiestas del mez de Tishri, delantre de mis ojos aparese la viyeja sinagoga de Unkapan. Kon el bruyido de las olas de la mar chafteyando sus vyejas paredes, su chika guertizika ande se aziya Suka, su azara estrecha, su teva, los bankos de los yahidimes ke viniyan de padre a ijo, ke kada uno teniya su lugar i la atmosfera spesiala de este lugar. Yo veygo la kara del Gabay, mi esfuegro, Bohor Filiba donde la vida fue atada a esta kehila. Un Gabaylik ke paso de jenerasyon en jenerasyon… Me akodro, komo, el mizmo, vyejo i hazino se suviya asta el tejado para dirijar los lavorantes. Porke siempre esta sinagoga tan vyeja teniya un problem kuando el tavan korriya i kuando la agua de la mar pasava por el patin i kaliya kaminar enriva las tavlas. Bohor Filiba iva ayudando a los proves del entorno, yevandoles komanya i kimur. Me akodro ke sus diyas dalkavo aviya un problem de elektrisita ke los estava preokupando.
El diya de sus funerayes los yahidim izieron pasar la araba por delantre de la kehila, avriyeron las puertas, asendyeron la almenara i disheron a boz alta “Vate en pas Padre! Tu kehila ya se arelumbro de muevo!”
La istorya de esta kehila ampesa en el anyo 1698. Se fraguo en la rejyon Cibali-Unkapan kon una eskala ande se aserkava kon barka. En los anyos sigientes paso aksidentes i reparasyones. En 1836, sigun lo ke se, los judios de este lugar kedaron sin kehila i se deviyan de ir a Balat para sus orasyones. Shabat siguro eran ovligados de irsen a piye. En tiempo de invyerno era muy penivle. En akeyos diyas unos de muestros nonos, Avram Filiba perkuro, peno i tomo la permisyon del Saray de renovar esta kehila, permisyon ke le fue akordada kon Ferman en Nisan 1836, el tiempo kreyo de Mahmut II, i la kehila se renovo.
Este Ferman fue guadrado en el boron de la famiya anyos i panyos, de jeneransyo a jeneransyo asta mozotros. Kuantas vezes lo miri, su eskritura viyeja i el muur ofisyal, un ferman kaje de un metro de anchura, su bordura adornada, los amostravamos a los ijikos de la famiya, i mizmo mi marido Avram Filiba aviya echo un kilif de teneke de forma silendrika para protejar el papel ke ya se aviya adelgazado. Este ferman se remetyo despues de las aktividades de su padre, kon sus propras manos al Gran Rabinato. En 1952, se ato a la Fundasion del Neve Shalom. Esta kehila era tipikamente una fragua de la epoka otomana; kuantos fuegos i restorasyones paso esta sinagoga. En 1985, kon el orden de las otoridades, la komunita fue ovligada ke esta fragua antigua se deroke. Ansina se izo un tereno al bodre de la mar. Mi marido i su ermano se ivan a asentar en un banko al bodre de la mar, para akodrarsen del pasado.
Ay muncho mas de kontar, me sinti un dever de eskrivir estos rekuerdos de la famiya i de sus keridos porke ya savemos ke tanto se avla de los serkanos desparesidos, nunka no se desparesen por entero. I los rekuerdos forman la baza de la istorya de un puevlo.
