En un periodiko de 75 anyos pasan varios kavzos. No se puede imajinarse. Kuando pensa la persona, es i muy kurto i es muy muy largo. Şalom tyene un arshivo muy ancho. Desde ke se emprimo por primera ves en 1947 fin a oy, kada anyo 50 semanas, kaji 3500 periodikos. Kuando estas tomando este arshivo en la mano estas remarkando i estas konosyendo una istorya de un puevlo: a kualo riye, a kualo da importansa, kualo es la kultura, las tradisyones, el modo de la vida, las fotografiyas sovre akeyos diyas aktuales te dan las indikasyones. En primero todo preto i blanko. Despues kon kolores. En primero kon el defondo Sinyor Avram Leyon kon una teknika ke kaliya muncha pasenya; todas las letras una a una se metiyan en fila kon la mano i agora estas pizando a un boton i la gazeta ke esta enderechada en la komputadora se esta mandando a las makinas del emprimo
Yo en 75 anyos tomi lugar kon la kontabilite i en la administrasyon del Şalom kaji 20 anyos. En este periodiko lavori muy oroza. Konosi a munchas personas valutozas. Munchos voluntaryos pasaron del Şalom. Todos estos kreeron en el Şalom, ke es la boz de un puevlo. Si un puevlo si tyene boz, es ke esta bivyendo i tyene valor. İ tyene menester de esta boz. Es verdad ke mos estamos enchikesyendo, es verdad ke kada diya esta mas difisil azer este echo en voluntaryo. Esto es una bandiera ke kale pasar i va pasar de mano a mano. Ayer estava difisil de topar eskrivanos en djudeo espanyol, oy no esta abastando las pajinas. Esto es un koraje. Para munchos anyos kerido Şalom, kon munchos eskrivanos i kon diyas klaros.
