El periodiko Şalom fue fondado por Avram Leyon el 29 de Oktobre del anyo 1947. Şalom esta selebrando oy su 75 aniversario.
Şalom sinyifika "pas’’ en ebreo. El logo de la gazeta ke aparese desde el primer numero endjuntos kon el titulo, es "A lo tuerto tuerto, a lo derecho derecho" ke sinyifika ‘ekspresar los pensamientos i entendimientos kon una mirada imparsyal, en no deshando la verdad’.
Avram Leyon teniya komo objektivo de prezentar un periodiko dinamiko a los lektores reuniendo nombres eksperimentados a su deredor. En mezmo tiempo, keriya dar lugar a los mansevos. Ansi, su pensamiento era krear un ponte entre los viejos i los mansevos. Ma, komo los mansevos no saviyan el judeo-espanyol, Leyon fue ovligado de trokar la lingua del periodiko i publikarlo en turko. Oy, Şalom tiene solo una pajina en judeo-espanyol i es el solo periodiko en el mundo entero ke publika eskritas en judeo-espanyol kada semana. El buto de dar lugar a las eskritas en judeo-espanyol es no romper las koneksiones kon el pasado i asegurar la kontinuasion de esta lingua.
En el anyo 1984, Şalom se reestrukto kon un personal mansevo i volontario. El periodiko se publika kada mierkoles, i desde 1994 el numero de pajinas suvió a vente.
Oy, Şalom kontiene artikolos sovre munchos kampos komo politika, istoria, ekonomia, arte, entrevistas, moda, traduksiones, fiestas relijiozas, salud, spor etc. Kada eskritor eskrive artikolos en su kampo de entereso. Ay tambien eskritores no judios en el periodiko.
Şalom oy es el uniko periodiko judio ke se publika en Turkiya. Mas de ochenta personas voluntarias i aktivas eskriven en la gazeta. Şalom es la boz de la komunidad judia.
Aparte de esto, kada mez, la gazeta publika la revista Şalom, ke es una de las revistas kulturales de mayor kalidad, i la revista El Amaneser, ke tiene komo objetivo kontinuar la lingua i la kultura ladino i prezantarla a las muevas jenerasiones.
De agora endelantre, ŞALOM va kontinuar a lavorar kon la mezma devosion en elevando de en diya en diya mas muncho su kalidad kultural.
Avram Leyon la mantuvo biva kon grande devosion, i mozotros vamos a kontinuar a segir su kamino.
Vos estamos remersiando por el apoyo ke estash dando al ŞALOM, ke es el uniko organo de komunikasion de la komunidad judia turka, en su 75en aniversario.
