Antes setenta i sinko anyos
Un andjelo avyo los ojos
Mos dyo luz komo el sol
Te admirimos todos mozos
Paso anyos, no troko nada
Alelumbrates grandes i chikos
Kuando vemos en kaza tu entrada
Dizimos de aryento, estos i munchos.
Şalom es un periodiko semanal publikado en Estanbol. Lo mas de los eskritores son voluntaryos i publikan para la komunidad djudia Turka. El periodiko fue fondado en 1947 por el defondo AVRAM LEYON. La primera edisyon se publiko el 29 oktobre ke era el diya de la republika de Turkiya.
Şalom tyene kaji 4000 myembros, se publika los diyas de myerkoles i se manda a las kazas de sus myebros. Kontyene notisyas komunitaryas, notisyas etranjeras, notisyas sovre la vida, kultura, arte, teknolojiya, relijyon, tradisyones djudias i karikaturas.
Los primeros tyempos se publikava en ladino ke konosiyan la majorita del puevlo. Ma kon tyempo, en el anyo 1984, troko i se empeso a publikar en turko, solo una u dos ojas en ladino para ke no se perya esta lingua antigua.
Por esta razon al mez una vez kita una revista de 32 pajinas, “EL AMANESER” enteramente en ladino i es la sola en el mundo entero.
Anyos munchos “ŞALOM” ke bivas munchos anyos tu i los ke lavoran por ti.
