Es 75 anyos antes ke el Sinyor Avram Leyon dyo karar de publikar un semanaryo. I metyo su nombre: “Şalom”. La gazeta era en Judeo-Espanyol en el empesijo. Era una epoka bastante libera para publikar gazetas. Un anyo dospues kon la fondasion del Estado Djudio, vemos syertas gazetas, mizmo ke azen propaganda para ke los Djudios turkanos se puedan ir mas kolay a Israel. Ma Avram Leyon era un kompatrioto bastante nasyonalisto. I kijo ke el primer numero del Şalom sea publikado el diya ke selebramos el diya de la fondasion de muestra republika: el 29 de Oktubre. En los primeros tyempos avia unos kuantos artikolos en turko. Ma kon el tyempo, komo los mansevos pensavan, avlavan i eskrivian en turko mas munchos artikolos en turko toparon lugar en el Şalom. Avram Leyon era la boz de la opozision. Eskrivia todo modo de artikolos kontra los dirijentes de muestra komunitad. I syertas vezes no puedia resivir publisidades porke no le davan. Leyon tenia una emprimeria; i es de este echo ke ganava paras. Mizmo gastava estas paras para ke el Şalom sea publikado. El sinyor Avram Leyon publiko su semanaryo asta el anyo 1983. Estava hazino i no teniya mas bastante poder materyel. Kale achetar ke en esta epoka teniya muy pokos lektores. Es en esta epoka ke syertos myembros de los dirijentes de muestra komunidad kijyeron ke se publike una gazeta. I un grupo enkavesado por Naim Güleryüz empesaron a lavorar. Ma es el Sinyor Eli Perahya, amigo de askerlik del Sinyor Avram Leyon ke reusho a konvenser a Avram Leyon para ke de el nombre “Şalom” a la kompanyia komersial Gözlem Gazetecilik A.Ş. I es kon la fyesta de Roshashana del anyo 1984 ke el primer numero del muevo Şalom fue publikado. Eran Leon Haleva, Süzet Sidi, Jako Molinas i un ancho grubo de mansevos ke lavoravan para el Şalom. En 1986, dospues del atake teroristo al Kal de Neve Şalom, el 6 del mez de Septembre uvo una grande diferensya de ideas entre el ekipo de la gazeta i syertos dirijentes de la komunidad i demisyonaron.
Empesando del 1986 asta oy, tres shef redaktores, yo Silvyo Ovadya, Yakup Barokas i İvo Molinas reushimos a publikar 1.800 diferentes numeros del Şalom en 36 anyos. I kero dizir ke no tuvimos dingun preteksto para no publikar ni una vez. Kreo ke empesimos kon 8 o 10 pajinas. Oy en diya syertos numeros son publikados asta 40 pajinas. Es djusto ke la teknolojia troko bastante para publikar mas fasilmente. Durante la epoka del Sinyor Leyon era muncho mas difisil. Oy en diya semos kapaches de aparejar i de publikar una gazeta en dos diyas. Vos djuro ke 36 anyos antes esto era un lavoro de una semana.
No vos va avlar sovre el Judeo-Espanyol. Ma estamos reushendo en lavorando i en topando munchas personas, mizmo mansevos ke mos estan eskrivyendo en muestro djudesmo. I es Karen, muestra direktrisa i redaktora ke mos organiza. Ma devesh de achetar ke uno koma mi ke se ambezo esta lingua verso la fin de su manseves tuvo el koraje i la disiplina de eskrivir kada semana durante los 15 anyos dalkavo.
