Johannes Gutenberg, ke es akreditado komo el enventador de la imprimeria, publiko la Biblia de Gutenberg en 1445. La teknolojiya de imprimeriya troko la forma de la edukasyon. La alfabetizasyon enternasyonal i el akseso al konosimyento se troko de una manera ke el mundo nunka aviya visto.
El “Puevlo del Livro” (los Djudios komunamente se yamavan el Puevlo del Livro) tambyen vido la oportunidad de propajar el konosimyento Djudio i del Djudaizmo i ansi partisipo al muevo esforso de imprimeriyas. En 1483, Joshua Soncino establesyo una de las primeras imprimeriyas Djudias del mundo en Soncino, Italia (60 km al este de Milano) i publiko el primer tratado del Talmud (Berahot). Un anyo despues, publiko los komentaryos de Rashi i el Ba' Alei Tosafot. Esta imprimeria tambyen se konose komo el primer a publikar la Biblia Ebrea kon puntos (nikudim). De otra parte, se vido la publikasyon del Talmud en otros lugares, mantenyendo el orden de Soncino del texto talmudiko kon komentaryos, i el primer fue en una imprimeria Veneziana del impresor non-Djudio, Daniel Bomberg, en el anyo 1520.
Sinko anyos despues ke Soncino establesyo una imprimeria en Italia, nasyo Joseph Caro en Espanya. Su famiya emigro pasando por la Turkiya i Caro arivo a Safed, en el norte de Israel. Se izo un eksperto sovre el mistisizmo i en la Alahah (ley Djudia). En 1522, el Rabino Caro empeso a eskrivir una importante ovra de Alahah. Su objektivo era kodifikar la ley Djudia bazandose en las tres grandes ovras de la Alahah ke presedaron a la suya, a saver, los kodigos del Rabino Isaac Alfasi (1013-1103) de Marroko, el Rabino Moises Maimonides (1135 -1204) de Ejipto, i el Rabino Asher ben Yehiel (1250-1327) de Almanya i Espanya. El komentaryo del Rabino Caro sovre el Arba'ah Turim del Rabino Jacob ben Asher (1269-1343) finalmente se troko en el Shulhan Aruh (meza preparada), una ovra otorizada sovre la ley Djudia, spesyalmente para los Djudios Sefaradis. El 2 de Elul de 1555, grasyas a la prezensya de una imprimeriya en Safed, la ovra monumental del Rabino Caro fue imprimada i propajada a todo el mundo Djudío. Esto permityo al Rabino Moshe Isserlis (1530-1572) de Krakovia, Polonya, publikar el Ma'pah (mantel), ke adjusto amejoramyentos al Shulhan Aruh, amostrando las diferensyas en la ley i los uzos de los Djudios Ashkenazis.
Achakes el konsensus istoriko i kultural sovre el Shulhan Aruh / Ma'pah, i devido a ke fue la primera ovra importante sovre la Alahah eskrita despues del invento de la imprimeria, se izo la primera ovra otorizada sovre la ley Djudia.
Unos kuantos anyos mas despues, el 20 de Av de 1558, se imprimo por primera vez el Zohar.
