El Gran Rabinato, anyos dospues troko su lugar ande estava enstalado. Se enstalo en el Yemenici sokak en la epoka del Gran Rabino, Hayim Becerano (1920-1931). Ya savemos ke el Gran Rabino Becerano bivio mizmo un syerto tyempo en este edifisio. No en buenas kondisyones. Es anyos dospues ke la Komunitad Djudia empleo un otro edifisio para la rezidensia del Gran Rabino. Oy en diya, el Gran Rabinato i la Direksion de muestra komunidad fonksyonan en una Plaza. Es djusto ke es mas luksuozo, ma no es un edifisio simboliko komo era.
Ya savemos ke era un edifisio bastante ancho. I todos los dokumentos i los livros relijiozos no kavyeron en el muevo lugar.
Keriyamos formar una mueva biblioteka en el muzeo Djudio. I komo kero azer todo, dishe ke me va enteresar en esto. Ma fue un echo de lokos. En el empesijo se egzaminaron los 9.500 livros ke se topavan en el Gran Rabinato. Ma dospues vimos ke ay guzanos i syertas kozas en los livros. I kon una firma eksperta en estos echos, kon syertas makinas todos los livros fueron dezenfektados kon ozono. No se si reelmente era el mijor remedio.Realizimos este echo en dos mezes ….
Merkimos syertos almarios de fierro en la mueva biblioteka i en primero metimos estos livros. Dospues esta biblioteka ke meresio el nombre de Naim Avigdor Güleryüz resivio los livros ke Güleryüz tenia en su biblioteka. Vamos resivir i todos sus dokumentos.
Antes ke realizemos esta seremonia de avyertura de la biblioteka amanyana va empesar a topar lugar para los livros muy presiozos del Sinyor Yılmaz Yermiya Benadrete, ke su alma repoze en pas.
Dospues de su muerte, su famiya me bushko para darmos estos livros. I 3-4 anyos antes, lavori diyas i diyas para arekojer estos livros. I estavan en un lugar en mi echo. Empesando del diya de djueves, transporti una partida al muzeo. Tenemos un proyekto para realizar un Sentro Sefaradi Evropeo en la Sinagoga Selaniko de Balat. Ma en los primeros planos no topimos un lugar para azer una biblioteka. I syertas personas me demandaron de ke formamos una biblioteka sefaradi/ ladino en este mizmo lugar. Amanyana devo de avlar kon Karen i kon muestros amigos del Sentro Sefaradi. I kreo ke estos livros van a enrikeser esta biblioteka.
Djueves entre las oras 17.30-19.30, estash envitados a la seremonia de avyertura de la biblioteka i del sentro de bushkedades. Vos devo dizir una otra vez ke dimos el nombre de Naim Avigdor Güleryüz a este Sentro.
