Estos diyas estamos biviendo las dezgrasyas de las gerras, ya estamos viendo en los jurnales i las televizyones las personas yorando por sus piedritas, seya por sus serkanos seya por sus kazas i sus bienes. Las bombas kayendo ensima las kazas i tanbien ensima las personas. Me demando komo pueden tener el korason duro para azer estas malisyas.
En viendo estas bombas ke kayeron ensima las personas me vino al tino un rekuerdo ke nunka me lo olvido.
En el lise, teniyamos una profesora de inglez ke se yamava Pakize Adalı. Era una profesora muy serioza. Siempre invyerno i enverano yevava una djaketika ensima los ombros. Era siedrera. Onestamente vos dizere ke no la keriyamos muncho bien. Komo todos los elevos mos burlavamos de eya por ke se boyadeyava los kaveyos kon Henna. I sus kaveyos blankos boyadeyados kon henna paresiya ke se metyo salsa de tomat a la kavesa.
Lo ke vos kero kontar, un diya mos apersivimos ke eya no teniya el braso derecho. La jaketika ke se metiya ensima sus ombros era para guadrar esta mankura. No me akodro kuala profesora mos konto su istoria.
Pakize biviya en Berlin. En el tiempo de la 2. gerra estava kon su novyo braso kon braso empleyando. Estavan en medyo la kaye kuando oyeron las sirenas de alarm ke dava haber ke van a kayer bombas. Ma no tuvieron tiempo de entrar a un refujio i ensupito oyo un bruido ke la ensodresio i la entontesyo. Kuando vino en si, vido una mancha de sangre en basho, ke era su novio. No solo su novio, tanbien su braso. Ansina la povereta Pakize se kedo sin braso i sin su novyo.
Kuando aviya oyido yo esto me aviya echo grande pena. I siempre pensava komo puede azer eya sus echos? Por egzemplo, lavarse, alimpyarse, gizar, mundar, eskrivir? Era el braso derecho ke le aviya mankado. Despues de akel diya me aviya pensado, si algun diya me afita lo mizmo a mi? Komo va pueder kontinuar a mi vida? I ampesi a eskrivir kon la mano siedra, komer kon la mano siedra, lavarme kon la mano siedra etc. En los empesijos estava muy muy difisil. Siguro no solo de azer mis echos kon mi siedra, tanbien estava difisil de azer los echos kon una mano sola. Por egzemplo, kortar la karne, partir pan, avrir la punta del kalem, vistir, desvistir… Mizmo aviya aprovado de pueder eskrivir kon el piye. Estava muy muy difisil ma reushi. I kon tiempo vide ke todo puediya ser posivle en keryendo i en esforsando.
En vezes vemos personas hazinas ke azen pinturas maraviyozas kon sus piezes i ay mizmo personas ke djugan instrumentos de muzika a la perfeksiyon. Todo esto es un echo de perseverensya, voluntad i kerer.
Todo es difisil, asta ke es fasil.
