El dalkavo djudyo de Saudi Arabia esta demandando permisyon al rey para pueder vijitar su paiz.
David Shunker ke nasyo en Saudi Arabia, arroga al rey del paiz, Selman bin Abdulaziz, la permisyon de vijitar su paiz ande nasyo.
Shunker avlo a un jurnalisto i disho: “Yo so la sola persona de la komunidad djudia ke biviya en Necran, Arabia Saudita. No se ke kadar va bivir ama mi dezeo es, de ver por la vez de alkavo, para dizir adios a mi uniko paiz ande nasi. Vos rogo de darme esta permisyon”.
Shunker kontando sus rekuerdos de su chikez, engrandesyendose en Necran, dyo luz sovre la vida de una de las komunidades djudias mas empresionantes ke uvo en la Diaspora. El konto: “Antes anyos biviyan 60 famiyas en Necran i en el doredor. Unos lavoravan en los anyos 1930-1940 por el primer rey de Saudia ke era Abdulaziz Ibni Suud, reparavan las armas de sus soldados. Los otros estavan lavorando komo chilingirdjis, vendiyan tapetes i aziyan otros lavoros…
Necran era una sivdad de Yemen i paso en 1934 a la dominasyon de Saudi Arabia. Los djudyos ke biviyan aya, se sintiyan muy seguros debasho la proteksyon del rey.
Kuando se fundo Israel en 1948, Shunker kon su famiya i toda la komunidad djudiya estuvyeron ovligados de salir del paiz i ir a otros paizes.
En los ultimos anyos, el mundo vido grandes trokamyentos en Arabia Saudita.
La Arabia Saudi avyo espasyo aeryano a aviyones de Israel. La administrasyon de Riyad permetyo ke unos kuantos merkaderes Israelyanos vijiten el paiz.
Se esta enformando ke Saudi Arabia tyene el objektivo de amijorar sus relasyones ekonomikas kon Tel-Aviv.
Mizmo ke no egziste relasyones diplomatikas ofisyales entre Arabia Saudita i Israel, la administrasyon de Riyad i Tel-Aviv estan mantenyendo konversasyones durante muncho tyempo.
Los kontaktos mensyonados se akseleraron en 2020, kuando el eks-presidente de los Estados Unidos, Donald Trump, sinyo el papel de mediador i preparo los Akordos de Abraham para la normalizasyon de las relasyones entre Israel i los paizes arabos. Tambyen en el anyo 2020, el eks-primer ministro de Israel Binyamin Netanyau, fue en sekreto a Saudi Arabia i se reunyó kon el prens del paiz.
Oy en dia las relasyones entre los dos paizes, se estan normalizando mas o menos kon el mediador de los Estados Unidos, Joe Biden.
Esperamos ke las relasyones de Israel seran muy reushidas kon todos los paizes del mundo i sovre todo kon los paizes arabos para pueder asegurar la Pas en el Medyo Oryente.
