Kristallnacht, literalmente la Noche de Los Kristales, ma jeneralmente traduizido komo la Noche de los Kristales Rotos, fue un trajiko punto de enfleksyon en el destino de la komunidad Djudia de la Almanya. El pogromo en la totalidad del paiz empeso el 9 de Novembre de 1938 i kontinuó asta el dia 10. Durante la Kristallnacht, serka de 100 Djudios fueron asasinados, 30.000 ombres Djudios fueron arrestados i mas tadre mandados a los kampos, syenes de Sinagogas fueron kemadas i profanadas i mas de 7.000 magazenes i komersos Djudios fueron destruidos o las vitrinas rompidas.
El pogrom i la viyolensa fue orkestrado por el ministro de propaganda Nazi, Joseph Goebbels. Ma, el governo Nazi mantuvo firmamente ke las aksyones fueron una reaksyon, solevantamyento spontaneo del puevlo alman kontra los Djudios. Tambyen inventaron kulpas kontra los Djudios para promulgar leyes adisyonales opresivas kontra los Djudios. I ansi, las indemnidades de las seguritas por las propiedades destruidas en los pogromos fueron demandados de los Djudios.
La ekskuza para el pogromo “spontaneo” fue la muerte, el 9 de Novembre, del diplomato Alman Ernst vom Rath en Paris. Tiró sovre el un joven Djudio de 17 anyos, Herschel Grynszpan. Joven, sin echo, i rezidente illegal bushkando a evitar la deportasyon de Paris, Grynszpan tiro sovre el diplomato komo una rekasyon, por vengarse de la deportasyon de su famiya a la Polonya. La famiya Grynszpan estava bivyendo en Hannover, Almanya desde 1911. En Oktobre de 1938, los Almanes ekspulzaron a todos los Djudios Polonezos de la Almanya djusto kuando la Polonya estava al punto de implementar una mueva ley ke alevantava el sudito Polako de las personas ke biviyan afuera de la Polonya durante mas de sinko anyos. Malgrado esta situasyon trajika, la Polonya refuzo de akseptar a los refujyados i unos 12.000 Djudios en este estado fueron embiyados a los kampos de refujyados en la frontyera.
La partisipasyon de los sivdadinos Almanes en los pogromos de una parte, la mankura de protestos de los vizinos i de mas de los paizes vizinos de otra parte, afirmo la opinyon de los Nazis de ke podian azer lo ke keriyan kontra los Djudios. Las mezuras opresivas anteriores fueron no tanto violentes, ma la Kristallnacht fue el primer paso en el kamino de la oror de la “Solusyon final”.
Este anyo era el 84en aniversaryo de la Kristallnacht.
