Este anyo el 18 noviembre, 2022
UNESCO empeso a selebrar el dia mundial de filosofia en 2002 i en 2005 lo deklaro ofisialmente ke, kada anyo, el treser jueves de noviembre se deve komemorar.
Deke la filozofia es importante? Porke son los prinsipios ke organizan i orientan el konosimiento de la realidad. Porke la filozofia es el amor de la saviduria i es la baza del pensamiento de la persona para ayudar a la paz mundial. Este dia es spesialmente destinado a los mansevos porke la filozofia es una disiplina ke estimula el pensamiento libre i kritiko. Asi se puede kontribuir a los problemes fundamentales del globo.
La filozofia es un estudio de la egzistensia, de lo ke es posivle de konoser i del komportamiento korekto i inkorekto. Es un kampo muy importante del pensamiento umano libre, para yegar al sentido mizmo de la vida. La praktika filozofika de kada dia, puede ayudar a transformar las diversas kulturas. Estimular el dialogo entre las kulturas i el pensamiento es un nesesito para konstruir sosiedades mas tolerentes i respektuozas. "La forma la mas elevada de intelijensia es la kapasidad de observar sin djuzgar” dize Krishnamurti.
Para UNESCO, la filosofia ofrese la baza de los prensipios i valores ke depende la paz mundial: la demokrasia, los derechos umanos, la djustisia, la igualidad. El ensenyamiento de la filozofia es primordial para las jenerasiones futuras i para el “bien estar” del mundo. “La edukasion es la arma la mas poderoza para trokar el mundo” dize N. Mandela. Devemos de azer de la filozofia el elemento sentral de muestra vida para gostar la dinyitad i la libertad. Biveremos endjuntos para defender el umanizmo de la violensia i de las tensiones.
Umor filozofiko: Le demandaron a Socrates, si es bueno de kazarse? Kada ombre deve kazarse, si su mujer es buena, el va ser orozo, si non va ser filozofo…
Konsejo filozofiko: “Nunka sos bastante viejo para tener un objektivo o para sonyar en un muevo sonyo” disho Aristoteles.
