En la eskrita de la semana pasada vos eskrivi rekuerdos del tiempo de la soba en muestra kaza. Rekuerdos trayen otros rekuerdos kon si. Agora ke me vino otro rekuerdo, kero partajerlo kon vozotros.
En muestra kaza, la soba se topava djusto en medyo de la kaza. Komo mi ermana i yo eramos chikas i korriyamos por aki por aya, mi papa aviya dado a azer un kafes de tavla al entorno de la soba, para ke si mos kayiyamos ensima, no mos kemaramos. Aparte de esto, teniyamos i una plaka de amyanto o asbesto detras de la soba kontra la pared para protejarla. Se topo agora ke amyanto es una koza muy danyozo i toksiko. Komo bivimos kon este tosigo aryentro de kaza anyos i panyos? Respirimos sus polvos ke puedeser se topavan en la kaza entera. No solo esto, teniyamos i una plata de amyant ke tostavamos pan ensima. I mos los komiyamos estos panes kon grande gusto. Bendicho el Dio ya estamos bivos dainda.
Vendremos a mi rekuerdo.
En lo ke estava yo en la sigunda klasa de la eskola judiya “Musevi Birinci Karma İlkokulu” teniyamos una profesora, Cemile Hanım. Diziyan ke era la mujer del İstanbul Polis Müdürü del tiempo de la revolusyon en 1960. Cemile hanım era muy serioza i nasyonalista. Akel anyo una semana antes de la fiesta de la Republika mos izo ambezar poeziyas. Mos disho ke vamos a resitar estas poeziyas en la seremoniya de akel diya el 29 de Oktubre. Para akeya seremoniya, mi mama me aviya kuzido un fostan de tafta kolorada kon un ombro solo, i debasho una bluzika blanka. Paresiya komo la bandiera turka, kolorada i blanka. Akel diya no me akodro komo se paso egzaktamente ma deviya ser un diya emosyonante.
Despues de la fiesta de la Republika mos vino la sira de fiestar el diya 23 Avril ke fiestamos la fiesta de la fondasyon del Parlamento de Turkiya i fiesta nasyonala de las kriyaturas.
De muevo mos ambezimos otras poeziyas i ivamos a resitarlas en la seremoniya. Yo gusto grande ke ya teniya akel fostaniko kolorado kon blanko se lo dishe a mi mama. Mi mama lo kijo arefreskar, le dyo una agua i la metyo ke se enshuge. Yo kon emosyon grande i despasensya, la estava kontrolando si ya se enshugo o no. A la fin de un tiempo, vide ke dainda no se enshugo, tomi el fostan i lo enkolgi a las reshas del kafes de al lado de la soba. I la aserki bueno bueno a la soba. Asigun vozotros kualo afito? Se kemo el medyo fostan, se chamushko tan bueno ke no se pudo vistir mas. Yo yorando, mi mama gritando, el fostan se fue al sierkol. Me visti otro fostan para la seremoniya ma no tuvo la mizma savor de la seremoniya de antes. Dainda me akodro kon regreto.
