En el anyo 1933, kon la propozisyon del direktor jeneral de UNESCO, Federico Mayor, el sinko de Oktubre fue akseptado komo Diya de Maestras en el mundo entero. Ma agora, en munchos paizes, este diya se esta selebrando en diferentes datas. En la Turkiya, kon la propozisyon de Atatürk, el vente i kuatro de Noviembre fue fiksado komo Diya de las Maestras.
En este diya, el mas ermozo mesaje por una maestra es: ‘Estamos apresiando tus eforsos!’.
El objektivo del Diya de Maestras es de motivar los governos i el puevlo, por la nesesita de developar las kondisyones de lavoro de las maestras i de elevar sus status en la sosiedad. Las maestras estan aziendo munchos esforsos para aparejar una jenerasyon pronta a los rapidos trokamientos de la vida de oy.
Segun el grande edukador Dr. Sarvapelli Radharkrishnan, ‘Las maestras deven de ser los mijores meyoyos de un paiz, porke eyas son las ke dan la formasyon a las kreaturas i a los mansevos’.
Si pensamos ke un elevo pasa los tres kuartos de un diya en la eskola, puedemos entender ke karar de grande es el efekto de la eskola i de las maestras en su developamiento. Los mas emportantes modeles en la vida de los elevos son las maestras.
El dover de una maestra no es solo de ensenyar, ma es tambien de formar la vida de los mansevos. Edukar es espander los orizones de los mansevos, mobilizar sus intelekto, i ensenyarlos a pensar djusto. En edukando, una maestra aze munchas kozas en mezmo tiempo. Ensenya, orienta, inspira, ayuda al progreso akademiko, sosyal, i emosyonal de sus elevos. En azyendo ganar a sus elevos buenas kalidades, una maestra pena para ke sus elevos se apersivan de sus talentos i ansi, ke ganen konfiensia. Determinar objektivos en la vida, krear muevas kozas, ser reushido i lo mas emportante, ambezarles a gerrear kon los problemes, son tambien los doveres de una maestra. En resume, una maestra ayuda sus elevos, a ser armados para pueder avrir las puertas de una vida mijor.
Oy, las personas deven ambezarsen muevas kozas kada diya i developar sus talentos para pueder alkansar los trokamientos kontinuales de la teknolojiya. Los medios de komunikasyon mos estan prokurando todo modo de enformasyon. El kargo de las maestras esta ogmantando de diya en diya. Las maestras estan partisipando en kursos para developar muevas metodes de ensenyar, para ambezarsen las novedades de la teknolojia i las muevas metodes de edukasyon. Eyas mezmo se estan aziendo elevas para pueder alkansar a la reforma de edukasion.
Oy, mas de siempre, las maestras tienen menester del suporte i del protejo de los governos i del puevlo para pueder sostener el kargo de estas responsabilidades.
Esperamos ke esta profesion, ke es tan respektada en el mundo entero, va elevar su status, va ganar mas muncho prestij, i ansi, en el futuro, las maestras van a reushir a ganar sus derechos, i a tener mas mijores kondisiones de lavoro i de vida.
