El 7 de Novembre era el 78en aniversaryo de la muerte de una poeta i martira: Hannah Senesh. Kon este kurto artikulo kije komemorar su memorya.
Hannah Senesh (Szenes) nasyo en Budapest, Hungarya, en el seno de una famiya Djudia ke por su tyempo se puede dizir asimilada, una famiya de klasa medya. Una avida eskritora de diaryos desde la edad de 13 anyos asta su muerte, Hannah mantuvo un diaryo personal ke amostrava el talento literaryo ke aviya eredido de su padre, Bela, un dramaturgo ke muryo kuando eya teníya sesh anyos.
Malgrado ke la famiya Senesh no partisipava aktivamente en la vida relijyoza Djudia en Budapest, al kontraryo, Hannah komo su ermano, George eran ferventes Sionistos.
En 1939, a los 18 anyos, Hannah renunsyo a su sonyo de una edukasyon universitarya, i se fue a la Palestina i se eskrivyo en una eskola de agrikultura. Mas tadre se enstalo en el kibutz S'dot Yam (Campos del mar) en Cesarea (Kisarya).
De otra parte en Hungarya, toda la komunidad Djudía (i entre todos la madre de Hannah) estavan sufriyendo terrivlemente achakes del antisemitizmo lokal. Aunke los Almanes no okuparon ofisyalamente la Hungarya asta 1944, el governo ungaro se aliyo kon las fuersas fashistas, la Almanya, Italya i sus aliados. Preokupada por su madre i ansiyoza para detener a los Nazis, aretar la salvajeriya almana, Hannah entro a la armada ingleza i se izo voluntarya para abashar kon parachut detras de las linyas enemigas komo espiona.
En Junyo de 1944, Hannah fue parashutada sovre la Yugoslavia i, djuntos kon una banda de partizanos Djudios klandestinos, paso la frontyera i entro a la Hungarya. Malorozamente, fueron kapturados en un kurto tyempo. El transmitor de radio en su sako fue una evidensya sufizyente para ser akuzados de espionaje i ser enkarselados.
Los Nazis detenyeron a Hannah en la prizyon durante kaji sinko mezes, tiempo durante el kual pudo komunikar kon su madre. Fue torturada kontinualmente, ma no salyo de su boka dinguna enformasyon i ansi los Nazis no pudyeron ambezarsen nada sovre la operasyon. El 7 de Novembre 1944, korespondyente al 20 de Heshvan, Hannah, de 23 anyos, fue ekzekutada por un peloton de fuzilamyento. Eya refuzo a ke le taparan los ojos komo es de uzo.
Los diaryos i poemas de Hannah, ke parvino a embiyar a su madre, se publikaron mas tadre. Syertas de sus poemas fueron kompozadas en kantikas populares ebreas. El koraje amostrado por esta joven fue una inspirasyon para munchas jenerasyones de jovenes.
Unas kuantas linyas de una de sus poemas mas famozas, “Alihah le Kisarya” – “Kaminado a Kisarya” konosido komo “Eli, Eli!”:
O Dyo, o Dyo, te rogo ke estas kozas nunka se eskapen,
La arena i la mar,
El susuryo de las aguas,
El relampago de los Syelos,
I la orasyon del Ombre.
Se uza de entonar esta kantika en los dias de la komemorasyon de la Shoah.
