Todos savemos lo ke es la “Kipa”, lo ke mos metemos en la kavesa en el Kal i por munchos Djudyos lo ke nunka se deve kitar de la kavesa por los ombres de muestro puevlo. La palavra vyene del Ivrit ke kere dizir la kupola o “kubbe” en Turko. En el sigundo livro de la Tora, en Shemot, vemos ke el Koen Gadol deve de kuvrir su kavesa. Se kreye ke el primer ombre ke se tapo su kavesa fue el Haham Rav Nahman ben Yitzhak de Bavel (Babilonya). El Talmud mos dize ke la Kipa mos aze akodrar ke El Dyo es la otoridad la mas alta ensima de mozotros. En la edad Medya, unos Djudyos diziyan ke no aviya ninguna ovligasyon de meterse chapeyo en la kavesa. Al kontraryo, en el Shulhan Aruh, Yosef Karo dize ke dingun Djudyo no puede kaminar mas de dos metros sin tener chapeyo.
Ama yene en la mizma epoka de la edad medya, algunos payizes evropeos komo Fransya i italya, desidyeron de ovligar el Djudyo a meterse un chapeyo en forma de kapak de kaldera kon un tenedor bastante alto. En 1215, el Papa Innocente III desidyo ke los Djudyos deviyan de metersen este chapeyo para ke no ayga dinguna meskla kon Kristyanos Katolikos, ke no se kazen entre eyos, i mas ke esto, para azer arebashar el Djudyo. Aun ke esta ley salyo en el siglo 13, la uzansa del chapeyo koniko se vyo mas i mas en los siglos 15 i 16, en el Renasimyento, kuando Evropa se vazyo de los Djudyos despues de las ekspulsyones. Este chapeyo se aze una marka, simbolizando el Djudyo malo ke arevata kriyaturas para azer Matsa kon sus sangres. La istoryadora, Naomi Lubrich, en su estudyo intitulado, “Judenhut und Zauberhut”, “Chapeyo djudyo i Chapeyo de Echizero” dize ke los Evropeos yegaron a la konkluzyon ke Djudyos i Echizeros tyenen dariyaver kon el guerko.
Este chapeyo ke devriya ekspulsar los Djudyos de la Sosyedad Nasyonal para evitar relasyones mikstos, fue por los Hahamim la salvasyon para evitar estas relasyones. Ansi los Djudyos no tomaron esta ovligasyon komo arebashar, se apropriyaron de esta ovligasyon para estar leshos de los Kristyanos, kuvriyendo sus kavesas, i despues la Kipa, ke al prensipyo no era un materyal de ritual, troko a ser avagar avagar parte del ritual relijyozo del Djudyo. La umilyasyon ke esperavan los Kristyanos se izo por los Djudyos un orgulyo. Al lugar de abokarsen delante los ordenes de los dirijentes, disheron ke se abokan a los ordenes del Dyo.
El Djudyo ke en la istorya mundiyal fue visto komo una figura oskura, mala i arebashado, syempre tuvo la frente alta i orguyozo de ser Djudyo.
AREVATANDO KRİYATURAS PARA AZER MATZA
