Todos ya konosemos la istorya i los faktos de Sir Moses Montefiore i su vida. El ayudo a su puevlo judio, ma no se avla bastante de su espoza Lady Judith ke lo akompanyo i lo sostuvo siempre en su misyon. Ija del sinyor Leon Baruh Kohen, vinida de una rika famiya Hollandeza de alta orijina Ashkenazi.
Judith se kazo kon Moses Montefiore mas chiko de eya de 9 mezes i eya era una persona posedando una alta kultura literera Ingleza. Eskriviya siempre sus rekordos en su jurnal. Konosiya perfektamente aparte del inglez, el fransez, el aleman, el italyano i konosiya el ebreo de la bibliya.
Lady Judith era tanbien muy kapachi en el gizado de komidas ermozas. Eya publiko el primer livro de komidas inglezas-sefaradi. No tenyendo kriyaturas i posedando munchas paras, el kuple Montefiore dedikaron sus vidas a los menesterozos, i sovre todo a alivyanar las difikultades de los judios enstalados en Israel.
50 anyos de su vida i de su tiempo i de su fuersa pasaron a ayudar su marido en su ovra, ovligarlo a deshar su lavoro de la edad de 40 anyos. El nombre de Yerushalayim era eskrito kon letras de oro, en el blazon (arma) de la famiya montefiore. En 1827 el kuple izo un viyaje relijiozo en Yerushalayim, el primer de las 7 vezes ke se fueron a la tierra santa. Viyajes kon grandes difikultades de esta epoka ke tomava mezes para pasar solo unos kuantos diyas en Yerushalayim.
Viendo las difikultades ekonomikas de los judios, eyos ayudaron a la fragua de la mahalle Miskenot Shaananim, primera mahalle moderna afuera de la viyeja sivdad de Yerushalayim kon la konstruksyon de un molino de ayre. Tanbien la famiya Montefiore pudo tomar el akordo del Sultan Otomano de akeya epoka para fraguar de muevo la Kehila Urva de Yerushalayim.
Izieron enstalar la primera tresa topografika de la sivdad, i mandaron un doktor para mirar los hazinos, i izieron mizmo un projekto de eskola profesyonal para ijas.
En 1839, topandose kon su marido en Yerushalayim, Lady Judith eskrive en su jurnal estos biervos, kon los kualos vamos a eskapar esta eskrita. “Me siento aki entornada de un sentimiento de serenidad i alegriya”.
Karos ermanos, miri de azer un chiko rezume de una de muestras selebras mujeres de la epoka del siglo presedente.
Bendicha sera su memorya.
