La semana pasada eskrivi mi artikolo unas kuantas oras dospues ke se termino este diya maraviyozo ke se eskapo kon muncha emosyon. Muncha emosyon porke la djente estava en merekiya dospues lo ke afito en Pera. Ya vos puedo dizir ke esta semana no teniyamos bastantes vijitadores en el Muzeo. Ma alhad la situasyon se enderecho. I un grupo de 31 Israelyanos vinyeron a vijitar el muzeo.
Reelmente es una reushita de pueder dar haber i de resivir entre 2.500 i 3.000 almas. I la mas grande partida personas ke no son Djudias. El diya Evropeo de la Kultura Djudia tyene komo buto de azer konoser a los ke no son Djudios los lugares (Sinagogas) ke apartyenen a los Djudios i syertos uzos, kostumbres, kozas relijiozas i la istoria de los Djudios en jeneral i de los Djudios Otomanos i Turkos espesialmente.
La Doktora İnci Türkoğlu i la arkitekta Çiğdem Öner dyeron eksplikasyones kon la moderasion de muestro amigo, Doğan Pinhas sovre las kavakaduras arkeolojikas realizadas en los kuatro puntos de Anatolia. Ya savemos ke tenemos a lo manko 5 sinagogas arkeolojikas de mas de 19 siglos. I la mas konosida es la ke se topa en Sardes, serka de Manisa en la parte oeste de muestro payis. Una ekspozisyon topo lugar kon esta konferensya: “La Identidad Djudia engravada en las Piedras”. Yako Taragano kon su koro de kantes de las Sinagogas tomaron shena en el Neve Shalom. Komo kantan desde munchos anyos, mos kantaron kantes ke kantamos en muestras orasyones i ke tyenen makames turkos. I esto le plaze muncho a los muzulmanos ke syenten kantes liturjikos kon makames turkos. Renan Kohen kon muestro amigo, Moris Levi se adjuntaron para avlar sovre su livro. Moris kada semana en el internet publika un kuento. I todos le demandavan deke no publika un livro kon estos kuentos. Mizmo el titolo era bastante enteresante: “Las Maymunas, las Patatas i el Edifisio del Opera de Berlin”!
En este diya teniamos otra una ekspozisyon sovre las Sinagogas de la Turkiya de İzzet Keribar.
Un filmo sovre la isla de Burgaz: “Estó en Burgaz” del Dr. Seyfi İşman; i un filmo de Ivet Acu Güney sovre la Kultura de la Komida Sefardi fueron mostrados munchas vezes en dos diferentes salas. Muestra amiga, Karen Şarhon organizo una konferensia sovre muestra lingua; el titolo era: "El Ayer, Oy i Amanyana del Ladino”.
Para terminar mi artikolo vos va kontar lo ke afita kon la boda ke es realizada por el grupo de teatro kada anyo. Esto no es para los Djudios. Es para las personas ke no asistyeron a una boda Djudia en sus vida. Ma komo kada anyo, syertos miembros de muestra komunidad koryeron para asentarsen en el primer rango. Reelmente no entendemos lo ke pensan. Espero ke vamos a resivir a lo manko esta kuantidad de djente el anyo ke viene.
