Tiempo de tranzision de la natura i de la persona
El otonyo, es una tranzision de kolores de la natura i de los pensamientos, sentimientos del umano. Las moshkas, las ormigas i las sigalas se guadran para aparejarsen a los tiempos kayntes. Los sielos trokan de kolor, los arvoles kon el aire se meneyan para deshar sus ojas amariyas i koloradas i illuminan el peyzaje para enkantarmos. Los vejetales i las frutas, kon sus savores diferentes i sus vitaminas mos aprontan al invierno. La noche rova oras del dia i viene el tiempo del pensamiento personal.
El estado mental se apronta para organizar projektos muevos. Ke va produsir, komo me puedo renovelar, komo puedo servir la umanidad para ke el mundo sea un lugar mas vivible para todos? Se puede tanbien konsakrar a su propio paz interior i bushkar kaminos para sentirse liada a la vida. Komo los arvoles soltan sus ojas sekas, desharemos todos los kargos del puerpo, olvidaremes todo lo ke mos molesta, disfrutaremos de kada momento para tener lugar de respirar i de prepararmos para el invierno, kon salud i kavesa serena. Kada uno de mozos tiene una grandor en su alma ke deve de nurisar i salvarla de influensas negativas.
Va terminar kon una dicha de Pirke Avot 1, 14 para desharvos kon penserios sovre el “yo” ke reprezenta el fondo de mozotros i el “mi” ke reprezenta la personalidad ke developamos durante muestra vida.
“Si yo no so para mi, ken sera para mi? I si yo so para mi, kualo so yo? I si no es agora, kuando?”
