En los diyas pasados meldi la istorya de Eddie Jaku, un sovrebiviente del Olokosto. En este livro enkontri munchos temas de los kualos me plaze avlar kon mis ijos i kon mis inyetos sovre la vida, afilu ke son propozisyones de la boka de una madre i no les plaze sintir muncho estas kozas. Este livro ya tomo su lugar entre mis livros de mi kavesera. La idea prinsipal del livro es ke la vida se forma kon muestras eleksiyones. Kualo son estas eleksiyones? Por egzemplo, komo keres bivir tu vida? Keres ser orozo o no? Keres azer un efekto pozitivo o negativo a tu entorno? Keres kontribuir al mundo una koza buena? A kual benadam no le plaze ser orozo. Ma malorozamente no es fasil por dingunos. El benadam puede dizir “la vida me trusho solo tristeza, sufrimiento o provedad. No tengo dinguna posibilidad para ser feliz. Komo va tener esperensa?”
En realidad es solo esta manera? Eddie Jaku es un sovrebiviente de Auschwitz. El salyo del kampo 28 kilos, despues de 7 anyos i bivyo 101 anyos en Australia komo un ombre muy, muy feliz del mundo, kon sus keridos, ijos, ermueras, inyetos i bisinyetos. Kuando salyo del kampo de konsantrasyon, mientras ke era desparesido, i el puerpo yeno de granos inflamados, se konosyo kon su mujerika, Flore i tomo a su primer ijo en sus brasos, se djuro ke el iva bivir la mas feliz vida para vengarse de Hitler. “Afilu kuando se eskurese muncho, el mundo syempre es yeno de miraklos”.
Kontar este livro kon pokas linyas va ser kategorizarlo komo un livro de otoayudo. Esto no es lo kero. Meldá este livro i topá las lesones por vuestra vida. Vash a ver el trokamiento de korason i vida por vuestras eleksiyones.
Tengo muncho dezeo de ver a los mansevos, un pokitiko ke keden, ke pensen a lo ke es importante. Oy en sus vidas estan penando para dar a sus famiyas konfor, rikezas, komodidad. Se olvidaron los mas valutozos. La importansya de la amistad en lugar de pasar un diya bueno. La importansya de tomar dover de ayudar a los ke sufren i a los menesterozos. La importansya de amostrar una chika i simple delikadeza puede salvar a una persona dezesperada. La saviduria es mas importante de la moneda i si tyenes una maniya de oro en tu braso, puedes salvar a otras vidas. Seyas feliz kon lo ke tyenes en la mano. No mires a tu vizino o lo ke tyene tu vizino en su mano.
Abraham Salomon Jakubowitz kon el nombre ke lo konosomos, Eddie Jaku eskapa su livro kon estas palavras:
"El amor me salvo.
Mi famiya me salvo.
Felisidad no va kayer del sielo de si para si. Felisidad esta aryento de tus manos. Kuando partisipas, vas a ver ke la mas unika koza, se aze dopyo.
La unika vengansa ke me interesa i la mijor vengansa para mi es, ser el mas felis ombre del mundo.
Kerido amigo muevo miyo, espero mi livro i mis palavras te alkanse i te toke."
